ഇന്ത്യയുടെ വിദേശകടം ഒരു നിമിഷം കൊണ്ട് ചരിത്രമാകും. പുറത്തുകൊണ്ടുവന്നാല് ഇന്ത്യയുടെ കുതിപ്പിനെ തടയാന് ഒരു ശക്തിക്കും കഴിയില്ല. ഇന്ത്യയുടെ സ്വര്ണ്ണഭ്രമത്തില് അമ്പരന്ന് ലോകം. പുതിയ കണക്കുകള് അറിയാം.Gold Investments: ഇന്ത്യക്കാരുടെ സ്വര്ണ്ണത്തോടുള്ള പ്രിയം ഇന്നും ഇന്നലെയും തുടങ്ങിയതല്ല. ലോകത്ത് ഏറ്റവും കൂടുതല് സ്വര്ണ്ണം ഉപയോഗിക്കുന്ന രാജ്യങ്ങളില് ഒന്നാണ് ഇന്ത്യ. ഇന്ത്യക്കാരുടെ സ്വര്ണ്ണഭ്രമം കൂടുതല് വ്യക്തമാക്കുന്നതാണ് പുതിയ കണക്കുകള്. റിപ്പോര്ട്ടുകള് പ്രകാരം ഇന്ത്യയിലെ വീടുകളിലും, ക്ഷേത്രങ്ങളിലുമായി മൊത്തത്തില് 50,000 ടണ് സ്വര്ണ്ണം ഉണ്ട്. അതായത് ഏകദേശം 10 ട്രില്യണ് ഡോളര്. കുറച്ചു കൂടി വ്യക്തമാക്കിയാല് 830 ലക്ഷം കോടി.
ഇന്ത്യന് വ്യാപാര സംഘടനയായ അസോസിയേറ്റഡ് ചേംബേഴ്സ് ഓഫ് കൊമേഴ്സ് ആന്ഡ് ഇന്ഡസ്ട്രി ഓഫ് ഇന്ത്യയുടെ റിപ്പോര്ട്ടാണ് ലോകത്തെ തന്നെ അമ്പരപ്പിച്ചിരിക്കുന്നത്. ലോകത്തിലെ ഏറ്റവും മികച്ച 10 കേന്ദ്ര ബാങ്കുകളുടെ സ്വര്ണ്ണ ശേഖരത്തേക്കാള് കൂടുതലാണ് ഇന്ത്യന് അലമാരകളില് നിഷ്ക്രിയമായിരിക്കുന്നത്. ഇന്ത്യക്കാരുടെ കൈവശമുള്ള ഈ സ്വര്ണ്ണത്തിന്റെ മൂല്യം അമേരിക്കയും ചൈനയും ഒഴികെ ലോകത്തിലെ മിക്കവാറും എല്ലാ രാജ്യങ്ങളുടെയും വാര്ഷിക ജിഡിപിയെ മറികടക്കുമെന്നതാണ് രസകരമായ വസ്തുത. ഈ സ്വര്ണ്ണം മികച്ച രീതിയില് കൈകാര്യം ചെയ്താല് ഇന്ത്യയുടെ കടം എല്ലാം ചരിത്രമാകും. ഈ സ്വര്ണ്ണം രാജ്യത്തിന്റെ ബാങ്കിംഗ് സംവിധാനത്തിലേക്ക് മാറ്റുകയോ, ബിസിനസുകളില് നിക്ഷേപിക്കുകയോ ചെയ്താല് ഇന്ത്യയുടെ വളര്ച്ചയെ പിടിച്ചുകെട്ടാന് ലോകത്ത് തന്നെ ആരും ഉണ്ടാകില്ല.വേള്ഡ് ഗോള്ഡ് കൗണ്സിലിന്റെ (ഡബ്ല്യുജിസി) കണക്കുകള് പ്രകാരം ഇന്ത്യയുടെ കേന്ദ്ര ബാങ്കായ ആര്ബിഐയുടെ കൈവശം ഏകദേശം 880.3 ടണ് സ്വര്ണ്ണമാണുള്ളത്. ഔദ്യോഗിക കണക്കുകള് പ്രകാരം സ്വര്ണ്ണ കരുതല് ശേഖരത്തിന്റെ പട്ടികയില് ഇന്ത്യ ലോകത്ത് എട്ടാം സ്ഥാനത്താണ്. ഒന്നാം സ്ഥാനത്തുള്ള അമേരിക്കയുടെ കരുതല് ശേഖരം 8,133 ടണ് ആണ്. ഇന്ത്യയുടെ കരുതല് സ്വര്ണ്ണ ശേഖരത്തേക്കാള് എത്രയോ മടങ്ങാണ് അലമാരകളില് നിഷ്ക്രിയമായി ഉറങ്ങുന്നതെന്ന് ചിന്തിച്ചു നോക്കൂ. സ്വകാര്യ സ്വര്ണ്ണ കൈവശത്തിന്റെ കാര്യത്തില് ഇന്ത്യ ലോകത്ത് മുന്നിലാണ്. പൗരന്മാരുടെ കൈവശമുള്ള ഗാര്ഹിക സ്വര്ണ്ണം ഇന്ത്യയുടെ ജിഡിപിയുടെ 125% വരുമെന്നാണ് വിലയിരുത്തല്. 2024 നും 2026 നും ഇടയില് സ്വര്ണ്ണ വിലയിലുണ്ടായ കുതിച്ചുചാട്ടം ഇന്ത്യന് കുടുംബങ്ങളുടെ കൈവശമുള്ള സമ്പത്തിന് വലിയ ഉത്തേജനം നല്കിയിട്ടുണ്ടെന്ന് കൊട്ടക് ഇന്സ്റ്റിറ്റിയൂഷണല് ഇക്വിറ്റീസിന്റെ കണക്കുകള് സൂചിപ്പിക്കുന്നു. ഇന്ത്യന് കുടുംബങ്ങളില് സൂക്ഷിച്ചിരിക്കുന്ന സ്വര്ണ്ണത്തിന്റെ മൂല്യം 5 ട്രില്യണ് ഡോളര് കവിഞ്ഞതായി 2026 ജനുവരിയിലെ കണക്കുകള് കാണിക്കുന്നു. കുടുംബങ്ങളുടെ കൈവശമുള്ള സ്വര്ണ്ണത്തിന്റെ മൂല്യം അവരുടെ ബാങ്ക്- ഓഹരി വിപണി നിക്ഷേപങ്ങളേക്കാള് ഏകദേശം 175% കൂടുതലാണ്. സ്വര്ണ്ണത്തില് ഇന്ത്യക്കാര്ക്കുള്ള പ്രതീക്ഷയാണ് ഇത് അടിവരയിടുന്നത്. ചരിത്രാതീകാലം മുതല് ഇന്ത്യക്കാര്ക്ക് സ്വര്ണ്ണം അവരുടെ ജീവിതത്തിന്റെ ഭാഗമാണ്. അടുത്തകാലത്താണ് സ്വര്ണ്ണത്തെ ഒരു നിക്ഷേപമായി അവര് കണ്ടുതുടങ്ങിയത്.
