സാധാരണക്കാരുടെ സമ്പാദ്യത്തിന് സുരക്ഷിതത്വവും, ഒപ്പം കോടികളുടെ ബമ്പർ സമ്മാനങ്ങളും പ്രഖ്യാപിച്ച് രംഗത്തെത്തിയിരിക്കുകയാണ് കെഎസ്എഫ്ഇ ലിമിറ്റഡ്. സാമ്പാദ്യത്തിനൊപ്പം സ്വന്തമായി ഒരു വില്ലയും, വാഹനവും സ്വപ്നം കാണുന്ന ഏതൊരു മലയാളി കുടുംബത്തിനും ഇതൊരു മികച്ച അവസരമാണ്. കെഎസ്എഫ്ഇ അടുത്തിടെ അവതരിപ്പിച്ച ഏറ്റവും പുതിയ ഒരു ചിട്ടി പദ്ധതിയാണ് കെ എസ് എഫ് ഇ എംപവർ ചിട്ടി. ഈ പദ്ധതിയെ പറ്റി നിങ്ങൾ അറിയേണ്ട കാര്യങ്ങളാണ് ഇനി പറയുന്നത്.
കെഎസ്എഫ്ഇ എംപവർ ചിട്ടി
സാധാരണക്കാരായ മലയാളി നിക്ഷേപകരെ ചിട്ടിയിലേയ്ക്ക് ആകർഷിക്കുകയാണ് ഈ സ്കീമിന്റെ പ്രധാന ലക്ഷ്യം. ഇതൊരു പ്രമോഷണൽ ക്യാമ്പയിൻ ആണെന്നും പറയവം. 1.5 കോടി രൂപ വിലമതിക്കുന്ന ആഡംബര വില്ല അല്ലെങ്കിൽ ഫ്ലാറ്റ് ആണ് ഈ സ്കീമിലെ മെഗാ സമ്മാനം. കൂടാതെ 200 ഇലക്ട്രിക് സ്കൂട്ടറുകൾ അടക്കം നിരവധി സമ്മാനങ്ങൾ ലഭ്യമാണ്. ചിട്ടി ഒരു മികച്ച സമ്പാദ്യ- വായ്പാ മാർഗ്ഗമാണെന്ന് പൊതുജനങ്ങളെ ബോധ്യപ്പെടുത്താനും, വിപണിയിലെ മറ്റ് നിക്ഷേപ പദ്ധതികളേക്കാൾ കൂടുതൽ ആളുകളെ കെഎസ്എഫ്ഇയിലേക്ക് ആകർഷിക്കാനുമാണ് ഇത്തരം വമ്പൻ സമ്മാനങ്ങൾ പ്രഖ്യാപിച്ചിരിക്കുന്നത്. നിശ്ചിത കാലയളവിനുള്ളിൽ ഈ ചിട്ടിയിൽ ചേരുന്നവർക്കാണ് നറുക്കെടുപ്പിലൂടെ സമ്മാനങ്ങൾ ലഭിക്കുക. 2026 ഏപ്രിൽ ഒന്നിന് ആരംഭിച്ച സ്കീമിൽ 2027 ഫെബ്രുവരി വരെ ലഭ്യമാണ്.
സ്കീം പ്രവർത്തനം എങ്ങനെ?
സാധാരണ കെഎസ്എഫ്ഇ ചിട്ടികളുടെ അതേ നിയമങ്ങൾ തന്നെയാണ് ഇവിടെയും ബാധകമാകുന്നത്. പക്ഷെ പ്രധാന വ്യത്യാസം ഈ ചിട്ടി സ്കീം വാഗ്ദാനം ചെയ്യുന്ന ബമ്പർ സമ്മാനങ്ങളാണ്. ചിട്ടി അടവുകൾക്കൊപ്പം നറുക്കെടുപ്പ് കൂപ്പണുകൾ കിട്ടും. പ്രതിമാസം 2,500 രൂപ മുതൽ 5,00,000 രൂപ വരെ അടവുള്ള ചിട്ടികൾ ഈ സ്കീമിനു കീഴിൽ ലഭ്യമാണ്. നിങ്ങൾ ചിട്ടി വിളിച്ചെടുക്കുന്നില്ലെങ്കിൽ ‘ഡിവിഡൻഡ്’ (ലാഭവിഹിതം) കുറച്ചുള്ള തുക മാത്രം പ്രതിമാസം അടച്ചാൽ മതിയാകും. അതായത് മറ്റുള്ളവർ ചിട്ടി വിളിക്കുമ്പോൾ വരുന്ന കിഴിവ് നിങ്ങളുടെ മാസത്തവണകളുടെ ഭാരം കുറയ്ക്കും.
സാധാരണക്കാർക്ക് നേട്ടമാകുന്നത് എങ്ങനെ?
കേരള സർക്കാരിന്റെ പൂർണ്ണ ഉടമസ്ഥതയിലുള്ള സ്ഥാപനമായതിനാൽ സാധാരണക്കാരുടെ പണം തികച്ചും സുരക്ഷിതമാണ്. പണം നഷ്ടപ്പെടുമെന്ന ഭയം വേണ്ട. ചിട്ടി ലേലം നടക്കുമ്പോൾ കിട്ടുന്ന കിഴിവ് തുക ചിട്ടിയിലെ മറ്റംഗങ്ങൾക്ക് ലാഭവിഹിതമായി വീതിച്ചു നൽകും. ഇത് ബാങ്ക് ആർഡികളേക്കാൾ മികച്ച ലാഭം നൽകും.
വീട് നിർമ്മാണം, വിവാഹം, വിദ്യാഭ്യാസം തുടങ്ങിയ അത്യാവശ്യ കാര്യങ്ങൾക്ക് കുറഞ്ഞ പലിശ നിരക്കിൽ വലിയൊരു തുക മുൻകൂറായി ലഭ്യമാക്കാൻ ചിട്ടി ലേലം വിളിച്ചെടുക്കുന്നതിലൂടെ സാധാരണക്കാർക്ക് സാധിക്കും. എംപവർ ചിട്ടികൾ വഴി കൃത്യമായി പണം സമ്പാദിക്കുന്നതിനൊപ്പം, 1.5 കോടിയുടെ വില്ലയോ, ഇലക്ട്രിക് സ്കൂട്ടറോ സ്വന്തമാക്കാനുള്ള വലിയൊരു സുവർണ്ണാവസരം കൂടിയാണ് നിങ്ങൾക്ക് ലഭിക്കുന്നത്.
