കൊച്ചി: ക്യാമ്പസ് ഫ്രണ്ട് പ്രവർത്തകർ കുത്തിക്കൊലപ്പെടുത്തിയ മഹാരാജാസ് കോളേജ് വിദ്യാർത്ഥിയും എസ്.എഫ്.ഐ നേതാവുമായിരുന്ന അഭിമന്യുവിന്റെ വധക്കേസിൽ വിചാരണ നടപടികൾ നാല് മാസത്തിനുള്ളിൽ പൂർത്തിയാക്കി വിധി പ്രസ്താവിക്കണമെന്ന് ഹൈക്കോടതി നിർദേശം. എറണാകുളം പ്രിൻസിപ്പൽ സെഷൻസ് കോടതിയോടാണ് ജസ്റ്റിസ് ഉത്തരവിട്ടത്. അഭിമന്യുവിന്റെ അമ്മ ഭൂപതി നൽകിയ ഹർജിയിലാണ് ഹൈക്കോടതിയുടെ സുപ്രധാന നടപടി. വിചാരണ പൂർത്തിയാക്കാൻ ഇനിയും സമയം നീട്ടിനൽകില്ലെന്നും കോടതി വ്യക്തമാക്കി.
കേസിലെ വിചാരണ നടപടികൾ നിർത്തിവെക്കണമെന്ന് ആവശ്യപ്പെട്ട് പ്രധാന പ്രതി മുഹമ്മദ് ഉൾപ്പെടെ അഞ്ചുപേർ നൽകിയ ഹർജി മുൻപ് ഹൈക്കോടതി തള്ളിയിരുന്നു. 17 മുതൽ 26 വരെയുള്ള പ്രതികൾക്കെതിരെ അനുബന്ധ കുറ്റപത്രം സമർപ്പിക്കുന്നതിന് മുൻപ് വിചാരണ തുടങ്ങരുതെന്നായിരുന്നു പ്രതികളുടെ വാദം. എന്നാൽ ഒന്നുമുതൽ 16 വരെയുള്ള പ്രതികളാണ് കൊലപാതകത്തിൽ നേരിട്ട് പങ്കെടുത്തതെന്നും തെളിവ് നശിപ്പിക്കാനും പ്രതികളെ ഒളിവിലിരിക്കാൻ സഹായിച്ചവർക്കുമെതിരെയുള്ള അനുബന്ധ കുറ്റപത്രം ഉടൻ നൽകുമെന്നും പ്രോസിക്യൂഷൻ വ്യക്തമാക്കി. ഈ വാദം അംഗീകരിച്ചാണ് ഹൈക്കോടതി കേസിന്റെ വിചാരണയുമായി മുന്നോട്ടുപോകാൻ അനുമതി നൽകിയത്.
2018 ജൂലൈ രണ്ടിനാണ് മഹാരാജാസ് കോളേജിലെ ചുവരെഴുത്തുമായി ബന്ധപ്പെട്ട തർക്കത്തെത്തുടർന്ന് അഭിമന്യു കൊല്ലപ്പെടുന്നത്. കേസിന്റെ വിചാരണ നടപടികൾ അനന്തമായി നീളുന്നതിനെതിരെ അഭിമന്യുവിന്റെ കുടുംബം നേരത്തെയും കോടതിയെ സമീപിച്ചിരുന്നു. ഒൻപത് മാസത്തിനകം വിചാരണ പൂർത്തിയാക്കണമെന്ന് മുൻപ് ഉത്തരവുണ്ടായിരുന്നെങ്കിലും കോടതി കസ്റ്റഡിയിൽ നിന്ന് കേസിന്റെ പ്രധാന രേഖകൾ കാണാതായത് വലിയ വിവാദങ്ങൾക്കും നടപടികൾ വൈകുന്നതിനും കാരണമായിരുന്നു. പിന്നീട് പുനഃസൃഷ്ടിച്ച രേഖകളുടെ അടിസ്ഥാനത്തിലാണ് വിചാരണ വീണ്ടും ആരംഭിച്ചത്.
