വരും വർഷങ്ങളിൽ വൻ പ്രഖ്യാപനങ്ങളുമായി രംഗത്തെത്താൻ ഒരുങ്ങുകയാണ് ആപ്പിൾ. 2026-നും 2027-നുമിടയിൽ ഫോൾഡബിൾ ഐഫോൺ,എഐ- പവർ ഗ്ലാസുകൾ, അപ്ഗ്രേഡ് ചെയ്ത എയർപോഡുകൾ, മാക്കുകൾ, ഐപാഡുകൾ, സ്മാർട്ട് ഹോം ഉപകരണങ്ങൾ എന്നിവ ഇതിൽ ഉൾപ്പെടുന്നു. ഈ പദ്ധതികൾ യാഥാർത്ഥ്യമായാൽ, കമ്പനിയുടെ വരാനിരിക്കുന്ന നിര അതിന്റെ ചരിത്രത്തിലെ ഏറ്റവും മികച്ച ഒന്നായിരിക്കും.
ബ്ലൂംബെർഗിന്റെ മാർക്ക് ഗുർമാൻ പറയുന്നതനുസരിച്ച്, ആപ്പിൾ ഇതുവരെ പുറത്തിറക്കിയിട്ടില്ലാത്ത ഉൽപ്പന്നങ്ങളായ സ്മാർട്ട് ഗ്ലാസുകൾ, ക്യാമറകൾ ഘടിപ്പിച്ച എയർപോഡുകൾ, ഒരു ടേബിൾടോപ്പ് റോബോട്ട് എന്നിവ പോലും ഈ നിരയിൽ ഉൾപ്പെട്ടേക്കാം. കൂടാതെ, ആപ്പിൾ ഈ വർഷം കമ്പനിയുടെ ആദ്യത്തെ മടക്കാവുന്ന ഐഫോണും അവതരിപ്പിക്കുമെന്നാണ് പ്രതീക്ഷിക്കുന്നത്.
ഫോൾഡബിൾ ഐഫോൺ ഈ വർഷം എത്തിയേക്കും
ഗുർമാന്റെ ഏറ്റവും പുതിയ പവർ ഓൺ’ ന്യൂസ്ലെറ്റർ പ്രകാരം, ഈ വൻ മാറ്റങ്ങൾക്ക് തുടക്കമാവുന്നത് ഈ സെപ്റ്റംബറോടെയായിരിക്കും. ആപ്പിൾ ഐഫോൺ 18 പ്രോ, ഐഫോൺ 18 പ്രോ മാക്സ്, ഐഫോൺ അൾട്രാ എന്ന് വിളിക്കുന്ന അതിന്റെ ആദ്യത്തെ മടക്കാവുന്ന ഐഫോൺ എന്നിവ പുറത്തിറക്കുമെന്നാണ് അദ്ദേഹം പ്രതീക്ഷിക്കുന്നത്.
ഈ ലോഞ്ച് ഇവന്റിൽ ആപ്പിൾ വാച്ച് സീരീസ് 12, ആപ്പിൾ വാച്ച് അൾട്രാ 4 എന്നിവയും അവതരിപ്പിച്ചേക്കാം. ഇതുകൂടാതെ, ഒന്നിലധികം മാക് കമ്പ്യൂട്ടറുകളും, അപ്ഗ്രേഡ് ചെയ്ത പ്രൊസസറിന്റെ സഹായത്തോടെ ആപ്പിൾ ഇന്റലിജൻസ് പിന്തുണയുള്ള പുതിയ എൻട്രി ലെവൽ ഐപാഡും ഈ വർഷം പുറത്തിറങ്ങുമെന്നാണ് വാർത്തകൾ.
മുഖം തിരിച്ചറിയാൻ കഴിയുന്ന ആപ്പിളിന്റെ സ്മാർട്ട് ഡിസ്പ്ലേ
ആപ്പിൾ ദീർഘകാലമായി വികസിപ്പിച്ച് കൊണ്ടിരിക്കുന്ന ‘സ്മാർട്ട് ഹോം ഹബ്’ ഈ വർഷം വിപണിയിലെത്താൻ സാധ്യതയുണ്ട്. 7 ഇഞ്ച് ഡിസ്പ്ലേയുള്ള ഈ ഉപകരണം വീടുകളിലെ ഒരു സെൻട്രൽ കമാൻഡ് ഹബ്ബായി പ്രവർത്തിക്കും. ഗുർമാന്റെ മുൻ റിപ്പോർട്ടുകൾ പ്രകാരം, ഒരു ചതുരാകൃതിയിലുള്ള ഐപാഡ് പോലെയായിരിക്കും ഇതിന്റെ രൂപം. ഇത് ഒരു അർദ്ധവൃത്താകൃതിയിലുള്ള സ്പീക്കർ ബേസിലോ അല്ലെങ്കിൽ ചുവരിലോ ഘടിപ്പിക്കാൻ കഴിയും. ആപ്പിൾ വാച്ചിന്റെ ഹോം സ്ക്രീനിന് സമാനമായ വൃത്താകൃതിയിലുള്ള ആപ്പ് ഐക്കണുകളായിരിക്കും ഇതിന്റെ ഇന്റർഫേസിൽ ഉണ്ടാവുക.
ഫേഷ്യൽ റെക്കഗ്നിഷൻ സംവിധാനമായിരിക്കും ഇതിന്റെ ഏറ്റവും വലിയ സവിശേഷത. ആളുകൾ സമീപിക്കുമ്പോൾ അവരെ തിരിച്ചറിയാനും കലണ്ടർ അപ്പോയിന്റ്മെന്റുകൾ, ഓർമ്മപ്പെടുത്തലുകൾ, കുറിപ്പുകൾ, സംഗീതം, വാർത്താ മുൻഗണനകൾ എന്നിവയുൾപ്പെടെ വ്യക്തിഗതമാക്കിയ വിവരങ്ങൾ പ്രദർശിപ്പിക്കാനും ഈ ഉപകരണം രൂപകൽപ്പന ചെയ്തിട്ടുണ്ടെന്നാണ് റിപ്പോർട്ട്.
കൂടാതം, OLED ഡിസ്പ്ലേയുള്ള പുതിയ ഐപാഡ് മിനിയും ആപ്പിൾ അണിയറയിൽ ഒരുക്കുന്നുണ്ട്. അതേസമയം, ആപ്പിൾ ഇന്റലിജൻസുള്ള ഒരു പുതിയ ആപ്പിൾ ടിവിയും ഹോംപോഡ് മിനിയും വിപുലമായ പരീക്ഷണ ഘട്ടത്തിലാണെന്ന് റിപ്പോർട്ടുണ്ട്. ഈ വർഷം തന്നെഅവ എത്തിയില്ലെങ്കിലേ അത്ഭുതപ്പെടാനുള്ളൂ എന്ന് ഗുർമാൻ പറയുന്നു. എന്നാൽ, ഇവയിൽ പ്രധാന ഡിസൈൻ മാറ്റങ്ങൾ പ്രതീക്ഷിക്കുന്നില്ല. പുതിയ സിരിക്കുള്ള പിന്തുണയും പുനർരൂപകൽപ്പന ചെയ്ത ആപ്പിൾ ടിവി റിമോട്ടുമായിരിക്കും ഏറ്റവും വലിയ അപ്ഗ്രേഡുകൾ.
ഐഫോണിന്റെ 20-ാം വാർഷികം
അടുത്ത വർഷം ഐഫോണിന്റെ 20-ാം വാർഷികമാണ്. റിപ്പോർട്ട് അനുസരിച്ച്, ആപ്പിളിന് ഇതിനായയി അതിലും വലിയ പദ്ധതികളാണുള്ളത്. രണ്ടാം തലമുറ ഐഫോൺ എയർ പുറത്തിറക്കിക്കൊണ്ടായിരിക്കും ആഘോഷങ്ങളുടെ തുടക്കം. ആദ്യ മോഡലിനെ കുറിച്ചുള്ള പ്രധാന പരാതികൾ പരിഹരിച്ച്, മികച്ച ബാറ്ററി ലൈഫും രണ്ട് റിയർ ക്യാമറകളും ഇതിലുണ്ടാകും.
എന്നാൽ എല്ലാവും കാത്തിരിക്കുന്ന ആ പ്രധാന പ്രഖ്യാപനം ആ വർഷം അവസാനത്തോടെയായിരിക്കും എത്തുക. ഐഫോണിന്റെ ഇരുപതാം വാർഷികത്തോടനുബന്ധിച്ച് പ്രത്യേക പതിപ്പുകളായ ഐഫോൺ 20 പ്രോ, ഐഫോൺ 20 പ്രോ മാക്സ് എന്നിവ ആപ്പിൾ പുറത്തിറക്കുമെന്നാണ് പ്രതീക്ഷിക്കുന്നത്. ഇവയ്ക്കൊപ്പം രണ്ടാം തലമുറ ഫോൾഡബിൾ ഐഫോണും വിപണിയിലെത്താൻ സാധ്യതയുണ്ട്.
