പുരസ്കാരം നേടിയ കർഷകൻ പോലും പിണറായി ഭരണത്തിൽ സുരക്ഷിതനല്ലയെന്ന് കോൺഗ്രസ് പ്രവർത്തകസമിതി അംഗം കെ. സുധാകരൻ എം.പി അഭിപ്രായപ്പെട്ടു .കർഷക പുരസ്കാരം നേടിയ ചെറുപുഴ ഇടവരമ്പിലെ ഏലിയാസ് അമ്പാട്ട് എന്ന കർഷകൻ കടബാധ്യതയുടെ ഭാരം സഹിക്കാനാകാതെ ജീവനൊടുക്കിയ ദാരുണ സംഭവം അതീവ വേദനാജനകവും ഞെട്ടിപ്പിക്കുന്നതുമാണ്. കാർഷിക മേഖലയിൽ വർഷങ്ങളോളം ആത്മാർത്ഥമായി പ്രവർത്തിച്ച് അംഗീകാരം നേടിയ ഒരാൾക്ക് പോലും ജീവിക്കാനുള്ള സാഹചര്യം ഉറപ്പാക്കാൻ കഴിയാത്ത അവസ്ഥയാണ് നിലവിലെ നരേന്ദ്രമോദി , പിണറായി സർക്കാരുകളുടെ കർഷക വിരുദ്ധ നയങ്ങൾ സൃഷ്ടിച്ചിരിക്കുന്നത്.
വിളവിലയുടെ തകർച്ച, ഉൽപ്പാദന ചെലവിലെ വർധന, കൃത്യസമയത്ത് ലഭിക്കാത്ത വായ്പയും സബ്സിഡികളും, കടാശ്വാസ നടപടികളുടെ അപര്യാപ്തത എന്നിവ കർഷകരെ അതീവ ദുരിതത്തിലേക്ക് തള്ളിവിടുകയാണ്. ഇത്തരം സാഹചര്യങ്ങളാണ് കർഷകരെ ആത്മഹത്യ പോലുള്ള അത്യന്തം ദാരുണമായ വഴികളിലേക്ക് നയിക്കുന്നത്.
കർഷക പുരസ്കാരം നേടിയ വ്യക്തി പോലും കടബാധ്യതയിൽ നിന്നും രക്ഷപ്പെടാൻ കഴിയാതെ പോയത് നിലവിലെ നയങ്ങളുടെ പരാജയത്തിന്റെ വ്യക്തമായ തെളിവാണ്. ഈ സംഭവം ഒറ്റപ്പെട്ടതല്ല; സംസ്ഥാനത്തുടനീളം കർഷകർ അനുഭവിക്കുന്ന വേദനയുടെ പ്രതീകമാണ്.
മരിച്ച കർഷകന്റെ കുടുംബത്തിന് അടിയന്തരമായി മതിയായ നഷ്ടപരിഹാരവും സാമ്പത്തിക സഹായവും സർക്കാർ നൽകണം. കൂടാതെ, കർഷകരുടെ കടങ്ങൾ എഴുതിത്തള്ളുന്നതിനുള്ള ഫലപ്രദമായ നടപടികളും ന്യായമായ മിനിമം പിന്തുണ വില ഉറപ്പാക്കുന്ന നയങ്ങളും സർക്കാർ ഉടൻ സ്വീകരിക്കണം.
കർഷകന്റെ ജീവൻ നഷ്ടപ്പെടാൻ കാരണമായ സാഹചര്യങ്ങൾ സമഗ്രമായി അന്വേഷിക്കുകയും, ഇത്തരമൊരു ദുരന്തം ആവർത്തിക്കാതിരിക്കാനുള്ള ദീർഘകാല കാർഷിക നയപരിഷ്കാരങ്ങൾ നടപ്പാക്കുകയും ചെയ്യണമെന്ന് കെ. സുധാകരൻ, എം.പി ആവശ്യപ്പെട്ടു.
