മസ്കറ്റ്: ഒമാനിലെ പ്രധാന ക്രൂഡ് ഓയിൽ കയറ്റുമതി കേന്ദ്രമായ ‘മിന അൽ ഫഹാൽ’ (Mina al Fahal) ടെർമിനലിൽ സ്ഫോടനം നടന്നതായി റിപ്പോർട്ടുകൾ. സ്ഫോടനത്തെ തുടർന്ന് തുറമുഖത്തുനിന്നുള്ള എണ്ണ കയറ്റുമതി ലോഡിംഗ് താൽക്കാലികമായി നിർത്തിവെച്ചതായി റിപ്പോർട്ട് ചെയ്തു.
തുറമുഖത്തെ സിംഗിൾ-ബോയി മൂറിംഗ് (SBM-1, SBM-2) സൗകര്യങ്ങൾക്കിടയിലാണ് സ്ഫോടനമുണ്ടായത്. ഇതൊരു ഡ്രോൺ ആക്രമണമാകാം എന്ന് ചില അനൗദ്യോഗിക വൃത്തങ്ങൾ സൂചിപ്പിക്കുന്നുണ്ടെങ്കിലും, ഒമാൻ ഭരണകൂടം ഇക്കാര്യത്തിൽ ഇതുവരെ ഔദ്യോഗിക സ്ഥിരീകരണം നൽകിയിട്ടില്ല. സ്ഫോടനത്തിന്റെ യഥാർത്ഥ കാരണം വ്യക്തമാകാൻ അന്വേഷണം പുരോഗമിക്കുകയാണ്.
റോയിറ്റേഴ്സ് (Reuters) പുറത്തുവിട്ട വിവരങ്ങൾ പ്രകാരം, അടിയന്തര സാഹചര്യത്തെ തുടർന്ന് നിരവധി സൂപ്പർടാങ്കറുകൾ തുറമുഖത്തിന് സമീപം കടലിൽ നങ്കൂരമിട്ടിരിക്കുകയാണ്. ഇത് എണ്ണ വിതരണ ശൃംഖലയെയും ലോഡിംഗ് പ്രവർത്തനങ്ങളെയും ബാധിച്ചുവെന്നതിന്റെ സൂചന നൽകുന്നു. ബിസിനസ് സ്റ്റാൻഡേർഡ് ഉൾപ്പെടെയുള്ള പ്രമുഖ മാധ്യമങ്ങളും വാർത്ത റിപ്പോർട്ട് ചെയ്തിട്ടുണ്ട്.എന്നാൽ, ആദ്യഘട്ടത്തിൽ പുറത്തുവന്ന ആശങ്കകൾക്ക് വിരുദ്ധമായി മിന അൽ ഫഹാൽ തുറമുഖത്തിലെ പ്രവർത്തനങ്ങൾ നിലവിൽ സാധാരണ നിലയിലാണെന്ന് പെട്രോളിയം ഡെവലപ്മെന്റ് ഒമാൻ (PDO) അറിയിച്ചു. ഇതോടെ എണ്ണ കയറ്റുമതി പൂർണ്ണമായി തടസ്സപ്പെട്ടു എന്ന തരത്തിൽ പ്രചരിച്ച ആദ്യ റിപ്പോർട്ടുകളിൽ ഭാഗികമായ തിരുത്തലുകൾ വന്നിട്ടുണ്ട്. എണ്ണ വിപണിയെ ബാധിക്കാതിരിക്കാൻ ആവശ്യമായ മുൻകരുതലുകൾ സ്വീകരിച്ചിട്ടുണ്ടെന്നും അധികൃതർ വ്യക്തമാക്കി.
