കണ്ണൂർ: സി.പി.എം നേതാവ് പി.കെ. ശ്രീമതിക്കെതിരെ അപകീർത്തികരമായ വ്യാജവാർത്ത പ്രചരിപ്പിച്ച സംഭവത്തിൽ സൈബർ പോലീസ് കേസെടുക്കുന്നു. കർമ്മ ന്യൂസ്, ജനം ടിവി, സുദിനം എന്നീ മാധ്യമ സ്ഥാപനങ്ങളെയും വാർത്തയ്ക്ക് പിന്നിൽ പ്രവർത്തിച്ചവരെയും പ്രതി ചേർത്താണ് കണ്ണൂർ സൈബർ പോലീസ് നടപടി സ്വീകരിക്കുന്നത്. ആലക്കോട് പോലീസിന്റെ സഹകരണത്തോടെ കണ്ണൂർ സൈബർ പോലീസ് സംഘം ശ്രീമതിയുടെ പരിയാരത്തെ വീട്ടിലെത്തി മൊഴി രേഖപ്പെടുത്തി.
കുന്നംകുളം മുൻ എം.എൽ.എ പി.കെ. കൃഷ്ണന്റെ ഭാര്യയെന്ന വ്യാജേന പി.കെ. ശ്രീമതി ഫാമിലി പെൻഷൻ കൈപ്പറ്റി എന്നായിരുന്നു പ്രചാരണം. എന്നാൽ, കൃഷ്ണന്റെ പത്നിയുടെ പേരും പി.കെ. ശ്രീമതി എന്നായിരുന്നുവെന്നും 2020-ൽ അവർ അന്തരിക്കുന്നത് വരെ പെൻഷൻ കൈപ്പറ്റിയിരുന്നത് അവരായിരുന്നുവെന്നതുമാണ് യാഥാർത്ഥ്യം. ഇതേ പേരിലുള്ള സാമ്യം മുതലെടുത്താണ് മുൻ എം.പി കൂടിയായ നേതാവിനെതിരെ മാധ്യമങ്ങൾ തെറ്റായ വാർത്ത നൽകിയത്.
വ്യാജ പ്രചാരണത്തിനെതിരെ വിട്ടുവീഴ്ചയില്ലാത്ത നടപടിയുമായി മുന്നോട്ടുപോകുമെന്ന് പി.കെ. ശ്രീമതി പറഞ്ഞു. വിഷയത്തിൽ മുഖ്യമന്ത്രിയും ആഭ്യന്തര മന്ത്രാലയവും ഇടപെടുകയും ഡി.ജി.പി നേരിട്ട് വിവരങ്ങൾ അന്വേഷിക്കുകയും ചെയ്തു. പോലീസിന്റെ പെട്ടെന്നുള്ള നടപടിയിൽ സംതൃപ്തിയുണ്ടെന്നും ഈ വിഷയത്തിൽ ആർക്കും മാപ്പില്ലെന്നും അവർ വ്യക്തമാക്കി.
