കേരളത്തിലെ റോഡുകളില് ഇന്ന് ഇലക്ട്രിക് വാഹനങ്ങളുടെ എണ്ണം ക്രമാതീതമായി വര്ധിച്ചുവരികയാണ്. ഇലക്ട്രിക് വാഹനങ്ങളുടെ തുടക്കത്തില് അവയോട് മുഖംതിരിച്ച മലയാളികള് ഇന്ന് എന്തുകൊണ്ട് അവ ഏറ്റെടുക്കുന്നുവെന്ന് നിങ്ങള് ചിന്തിച്ചിട്ടുണ്ടോ? അതിനുള്ള പ്രധാന ഉത്തരം നേട്ടം എന്നതു തന്നെ. സര്ക്കാര് ഇത്തരം വാഹനങ്ങള്ക്ക് നല്കുന്ന ഇളവുകളും, പ്രോല്സാഹനവും മറ്റൊരു പ്രധാന ഘടകമാണ്. ഇലക്ട്രിക് വാഹനങ്ങളുടെ ഉപയോഗം മൂലം സാധാരണക്കാര്ക്ക് ലഭിക്കുന്ന ലാഭത്തെക്കുറിച്ചും, കേന്ദ്ര- സംസ്ഥാന സര്ക്കാരുകള് നല്കുന്ന ഇളവുകളെക്കുറിച്ചും അറിയാന് വായന തുടരുക.
ഇലക്ട്രിക് പ്രിയത്തിനുള്ള കാരണങ്ങള്
പെട്രോള്, ഡീസല് വിലയിലുണ്ടാകുന്ന നിരന്തരമായ വര്ധന പലരെയും അസ്വസ്തരാക്കുന്നു. സര്ക്കാര് എഥനോള് ഇന്ധനം നിര്ബന്ധമാക്കിയത് പഴയകാല വാഹനങ്ങളുടെ അറ്റകൂറ്റ ചെലവുകള് വര്ധിപ്പിച്ചു. തുടക്കത്തില് മലയാളികള് ഇലക്ട്രിക് വാഹനങ്ങളോട് മുഖം തിരിക്കാന് കാരണം ബാറ്ററിയുമായി ബന്ധപ്പെട്ട് ആശങ്കകളും, ചാര്ജിംഗ് സ്റ്റേഷനുകളുടെ പരിമിതിയും കാരണമായിരുന്നു. എന്നാല് ഇന്ന് ഇവ ഒരു പരിധി വരെ മാറികഴിഞ്ഞു.
ബാറ്ററി ടെക്നോളജി കൂടുതല് മെച്ചപ്പെട്ടു. കമ്പനികള് ബാറ്ററികളുടെ വാറണ്ടി വര്ധിപ്പിച്ചത് ഉപയോക്താക്കളെ ആകര്ഷിച്ചു. കേരളത്തില് കെഎസ്ഇബിയുടെയും, മറ്റ് സ്വകാര്യ ഏജന്സികളുടെയും നേതൃത്വത്തില് ചാര്ജിംഗ് സ്റ്റേഷനുകളുടെ ശൃംഖല വളരുകയാണ്. പരിസ്ഥിതി മലിനീകരണം കുറയ്ക്കുന്നതിനും, കാര്ബണ് ഉദ്വമനം നിയന്ത്രിക്കുന്നതിനും കേരളത്തിലെ ജനങ്ങള് കൂടുതല് താല്പ്പര്യം കാണിക്കുന്നുവെന്നു പറയുന്നതിലും തെറ്റില്ല.
കുറഞ്ഞ വിലയില് കൂടുതല് ദൂരമുള്ള വാഹനങ്ങള് കമ്പനികള് പുറത്തിറക്കാന് തുടങ്ങിയതോടെ ഇന്ധനവാഹനങ്ങളോടുള്ള പ്രിയം ഉപേക്ഷിക്കാന് പലരും തയ്യാറായി. കേന്ദ്ര പിന്തുണയ്ക്കു പുറമേ, ഹരിത കേരളം പദ്ധതിയുടെ ഭാഗമായി ഇലക്ട്രിക് വാഹനങ്ങളെ പ്രോത്സാഹിപ്പിക്കുന്നതിനുള്ള സംസ്ഥാന ര്ക്കാരിന്റെ ശക്തമായ പിന്തുണ കാര്യങ്ങള് എളുപ്പമാക്കുന്നു.
എത്ര രൂപ ലാഭിക്കാന് കഴിയും?
ശരാശരി മൈലേജുള്ള ഒരു പെട്രോള് സ്കൂട്ടറില് 1 കിലോമീറ്റര് സഞ്ചരിക്കാന് ഏകദേശം 2 മുതല് 2.50 രൂപ വരെ ചെലവ് വരുമെന്നാണ് വിദഗ്ധര് പറയുന്നത്. എന്നാല് ഒരു ഇലക്ട്രിക് സ്കൂട്ടറില് ഇതേ ദൂരം പിന്നിടാന് വെറും 20 പൈസ മുതല് 30 പൈസ വരെ മാത്രമാണ് ചെലവ്.
നിങ്ങള് ദിവസവും 40- 50 കിലോമീറ്റര് യാത്ര ചെയ്യുന്ന ഒരാളാണെങ്കില് പെട്രോള് ഇനത്തില് മാത്രം മാസം 3,000 – 4,000 രൂപ വരെ ചെലവാക്കേണ്ടി വരും. എന്നാല് ഇവി ഉപയോഗിക്കുകയാണ് ഈ ചെലവ് 400- 500 രൂപയില് നില്ക്കും. അതായത് നിങ്ങള്ക്ക് നിങ്ങളുടെ യാത്രയില് ഒരു വിട്ടുവീഴ്ചയും വരുത്താതെ തന്നെ മാസം 2,500 രൂപ മുതല് 3,500 രൂപ വരെ ലാഭിക്കാം.
നിങ്ങള് ദിവസവും 100 കിലോമീറ്ററിന് മുകളില് യാത്ര ചെയ്യുന്ന ഒരു വ്യക്തിയാണെങ്കില് നിങ്ങളുടെ ഇലക്ട്രിക് വാഹന ഉപയോഗം വലിയ നേട്ടം നല്കും. റിപ്പോര്ട്ടുകള് പ്രകാരം ഒരു സാധാരണക്കാരന് ഇലക്ട്രിക് ഇരുചക്ര വാഹനം ഉപയോഗിക്കുന്നത് വഴി പ്രതിവര്ഷം 30,000 രൂപ മുതല് 40,000 രൂപ വരെ ഇന്ധനച്ചെലവില് ലാഭിക്കാന് സാധിക്കും. ഇലക്ട്രിക് കാറുകളിലെ നേട്ടം മുകളിലെ കണക്കുകളെ മറികടക്കുമെന്നും വിദഗ്ധര് പറയുന്നു.
ഇലക്ട്രിക് വാഹനങ്ങളില് എന്ജിന്, ഗിയര് ബോക്സ് എന്നിവ ഇല്ലാത്തതിനാല് ഓയില് ചേഞ്ച്, ഫില്ട്ടര് മാറ്റല് തുടങ്ങിയ പതിവ് സര്വീസ് ചെലവുകള് ഇല്ല. ഇത് വഴി വര്ഷത്തില് വലിയൊരു തുക ലാഭിക്കാം.
ഇലക്ട്രിക് ബൈക്ക് : നേട്ടങ്ങള്
- നഗരങ്ങളിലെ കനത്ത ട്രാഫിക്കിലൂടെ എളുപ്പത്തില് യാത്ര ചെയ്യാം.
- വീട്ടിലെ സാധാരണ പ്ലഗ് പോയിന്റില് കുത്തി എളുപ്പത്തില് ചാര്ജ് ചെയ്യാം.
- ഡെലിവറി ജോലികള് ചെയ്യുന്നവര്ക്കും, വിദ്യാര്ഥികള്ക്കും ദിവസേനയുള്ള യാത്രകള്ക്ക് എളുപ്പമാണ്.
ഇലക്ട്രിക് കാറുകള്
- ശബ്ദമില്ലാത്ത സുഖകരമായ യാത്ര ആസ്വദിക്കാം.
- ഉയര്ന്ന സുരക്ഷാ ഫീച്ചറുകളും ആധുനിക സാങ്കേതികവിദ്യയും.
- ദീര്ഘദൂര യാത്രകളില് പെട്രോള്/ഡീസല് കാറുകളെ അപേക്ഷിച്ച് വന് സാമ്പത്തിക ലാഭം.
- ഓട്ടോമാറ്റിക് ഗിയര് സംവിധാനം ഉള്ളതിനാല് ഡ്രൈവിംഗ് ലളിതമാണ്. കേന്ദ്ര സര്ക്കാര് ഇളവുകള്
- സാധാരണ വാഹനങ്ങള്ക്ക് 28% വരെ ജിഎസ്ടി ഈടാക്കുമ്പോള്, ഇലക്ട്രിക് വാഹനങ്ങള്ക്ക് ഇത് വെറും 5% മാത്രമാണ്. ചാര്ജറുകള്ക്കും 5% ജിഎസ്ടി ബാധകമാണ്. ഇത് വലിയ നികുതി നേട്ടം നല്കുന്നു.
- PM E-DRIVE പദ്ധതിക്ക് കീഴില് തിരഞ്ഞെടുത്ത ഇലക്ട്രിക് ഇരുചക്ര, മുചക്ര വാഹനങ്ങള്ക്ക് നേരിട്ടുള്ള പര്ച്ചേസ് സബ്സിഡി കിട്ടും.
- ഇലക്ട്രിക് വാഹനം വാങ്ങാന് എടുക്കുന്ന ലോണുകള്ക്ക് ആദായനികുതി സെക്ഷന് 80ഇഇബി പ്രകാരം ഒരു സാമ്പത്തിക വര്ഷത്തില് പലിശയിനത്തില് 1.5 ലക്ഷം രൂപ വരെ ഇളവ് കിട്ടും.
കേരള സംസ്ഥാന സര്ക്കാര് ഇളവുകള്
- കേരളത്തില് ഇലക്ട്രിക് വാഹനങ്ങള് രജിസ്റ്റര് ചെയ്യുമ്പോള് റോഡ് നികുതിയില് വലിയ ഇളവുകള് ലഭിക്കും.
- ഇലക്ട്രിക് വാഹനങ്ങളുടെ രജിസ്ട്രേഷന് ഫീസിലും സംസ്ഥാന മോട്ടോര് വാഹന വകുപ്പ് ഇളവ് നല്കുന്നുണ്ട്.
- പരിസ്ഥിതി സൗഹൃദ ഗതാഗതത്തെ പ്രോത്സാഹിപ്പിക്കാന് സംസ്ഥാന ബജറ്റുകളിലും ഹരിത നികുതി ഇളവുകളും പ്രഖ്യാപിക്കാറുണ്ട്.
