കുറഞ്ഞ ബജറ്റിൽ ഉയർന്ന ലാഭം: നിക്ഷേപകർക്ക് വൻ മുന്നേറ്റം പ്രവചിച്ച് 5 ബാങ്ക്-പൊതുമേഖലാ ഓഹരികൾ
മുംബൈ: ഓഹരി വിപണിയിൽ ചെറിയ തുക നിക്ഷേപിച്ച് ഉയർന്ന നേട്ടം ഉണ്ടാക്കാൻ ആഗ്രഹിക്കുന്നവർക്കായി 100 രൂപയിൽ താഴെ വിലയുള്ള 5 മുൻനിര ഓഹരികൾ സാമ്പത്തിക വിദഗ്ധർ നിർദേശിക്കുന്നു. തുടക്കക്കാരായ നിക്ഷേപകർക്കും അനുയോജ്യമായ ഈ ഓഹരികളിൽ 25 ശതമാനം വരെ വളർച്ചാ സാധ്യതയാണ് പ്രമുഖ റേറ്റിംഗ് ഏജൻസികൾ പ്രവചിക്കുന്നത്.
റീട്ടെയിൽ വായ്പകളിലും നിക്ഷേപങ്ങളിലുമുണ്ടായ മികച്ച മുന്നേറ്റവും കിട്ടാക്കടങ്ങൾ ഗണ്യമായി കുറയ്ക്കാനായതും ഐ.ഡി.എഫ്.സി ഫസ്റ്റ് ബാങ്കിന് കരുത്താകുന്നുണ്ട്. നിലവിൽ 86.50 രൂപ വിലയുള്ള ഈ ബാങ്കിംഗ് ഓഹരിക്ക് 100 രൂപയാണ് ലക്ഷ്യവില പ്രതീക്ഷിക്കുന്നത്.
പുനരുപയോഗ ഊർജ്ജ മേഖലയിലെ ദ്രുതഗതിയിലുള്ള മുന്നേറ്റം എൻ.ടി.പി.സി ഗ്രീൻ എനർജിക്ക് വൻ അവസരങ്ങളാണ് തുറന്നുനൽകുന്നത്. സോളാർ, വിൻഡ് പദ്ധതികൾ വ്യാപിപ്പിക്കുന്ന ഈ പൊതുമേഖലാ സ്ഥാപനത്തിന്റെ ഓഹരികൾ നിലവിൽ 95.70 രൂപയിലാണ് വ്യാപാരം നടക്കുന്നത്. ഇതിന് 120 രൂപ വരെ ഉയരാൻ സാധിക്കുമെന്നാണ് വിലയിരുത്തൽ.
അടിസ്ഥാനസൗകര്യ വികസന രംഗത്ത് സർക്കാരിന്റെ മുൻഗണനാ പദ്ധതികളുടെ വലിയ ഓർഡറുകൾ കൈവശമുള്ള എൻ.ബി.സി.സി ഇന്ത്യയുടെ ഓഹരി വില 90 രൂപയിൽ നിന്ന് 109 രൂപയിലേക്ക് ഉയരുമെന്ന് കരുതുന്നു.
വായ്പാ വിതരണത്തിലും പ്രവർത്തന ലാഭത്തിലും മികച്ച തിരിച്ചു വരവ് നടത്തുന്ന സൗത്ത് ഇന്ത്യൻ ബാങ്കിന്റെ നിലവിലെ വില 45.70 രൂപയാണ്. കുറഞ്ഞ മൂല്യത്തിൽ ലഭ്യമായ ഈ ഓഹരിക്ക് 52 മുതൽ 55 രൂപ വരെയാണ് പ്രതീക്ഷിക്കുന്ന ലക്ഷ്യവില.
നിർമ്മാണ മേഖല സജീവമായതോടെ രാജ്യത്തെ മുൻനിര ഇരുമ്പയിര് ഉൽപ്പാദകരായ എൻ.എം.ഡി.സി ലിമിറ്റഡിന്റെ ആവശ്യകതയും വർധിച്ചിട്ടുണ്ട്. നിക്ഷേപകർക്ക് തുടർച്ചയായി മികച്ച ലാഭവിഹിതം നൽകുന്ന കമ്പനിയുടെ നിലവിലെ വില 85.60 രൂപയും പ്രതീക്ഷിക്കുന്ന ലക്ഷ്യവില 100 രൂപയുമാണ്.
More like this
