ഇന്ത്യയിലെ ഏറ്റവും വലിയ ലുലു മാൾ അഹമ്മദാബാദിൽ; 4,000 കോടിയുടെ ബൃഹദ് പദ്ധതിയുമായി ലുലു ഗ്രൂപ്പ്
അഹമ്മദാബാദ്: ലുലു ഗ്രൂപ്പ് ഇന്ത്യയിലെ തങ്ങളുടെ ഏറ്റവും വലിയ ഷോപ്പിംഗ് മാൾ ഗുജറാത്തിലെ അഹമ്മദാബാദിൽ നിർമ്മിക്കുന്നു. അഹമ്മദാബാദിലെ ചാന്ദ് ഖെഡയിൽ ലേലത്തിലൂടെ 519 കോടി രൂപയ്ക്ക് സ്വന്തമാക്കിയ 21 ഏക്കർ ഭൂമിയിലാണ് 4,000 കോടി രൂപയുടെ ബൃഹദ് പദ്ധതി യാഥാർത്ഥ്യമാകുന്നത്. അന്താരാഷ്ട്ര നിലവാരത്തിലുള്ള ഷോപ്പിംഗ് മാളിന് പുറമെ ഫൈവ് സ്റ്റാർ ഹോട്ടൽ, സർവീസ് അപ്പാർട്ടുമെന്റുകൾ എന്നിവയും ഈ സമുച്ചയത്തിന്റെ ഭാഗമായി ഉയരും. പദ്ധതി പൂർത്തിയാകുന്നതോടെ മേഖലയിൽ 15,000 പേർക്ക് നേരിട്ടും അല്ലാതെയും തൊഴിൽ ലഭിക്കുമെന്നാണ് പ്രതീക്ഷിക്കുന്നത്. ഇതിന് പുറമെ സംസ്ഥാനത്ത് ഫുഡ് പാർക്ക്, ഫിഷ് പ്രൊസസിംഗ് പ്ലാന്റ് എന്നിവ ആരംഭിക്കാനും ഗ്രൂപ്പിന് പദ്ധതിയുണ്ട്.
പദ്ധതിയുമായി ബന്ധപ്പെട്ട് കേന്ദ്ര ആഭ്യന്തര മന്ത്രി അമിത് ഷായുമായി ലുലു ഗ്രൂപ്പ് ചെയർമാൻ എം.എ. യൂസഫലി കൂടിക്കാഴ്ച നടത്തി. പ്രൊജക്റ്റ് സമയബന്ധിതമായി പൂർത്തിയാക്കാൻ ആവശ്യമായ എല്ലാ പിന്തുണയും സർക്കാരിന്റെ ഭാഗത്തുനിന്ന് കേന്ദ്രമന്ത്രി ഉറപ്പുനൽകിയിട്ടുണ്ട്. യു.എ.ഇ – ഇന്ത്യ സാമ്പത്തിക ഇടനാഴിയുടെ പ്രധാന കേന്ദ്രമായി ഗുജറാത്ത് മാറുമെന്ന വിലയിരുത്തലുകൾക്കിടെയാണ് ലുലുവിന്റെ ഈ വൻ നിക്ഷേപം എത്തുന്നത്. ഇതിനിടെ കേരളത്തിലെ സാന്നിധ്യം ശക്തമാക്കുന്നതിന്റെ ഭാഗമായി കോട്ടയം ചങ്ങനാശ്ശേരിയിലെ കെ.ജി.എ മാളിൽ 50,000 ചതുരശ്ര അടി വിസ്തീർണ്ണത്തിൽ പുതിയ ലുലു ഹൈപ്പർമാർക്കറ്റ് ആരംഭിക്കാനും ഗ്രൂപ്പ് തയ്യാറെടുക്കുകയാണ്. ഇത് വഴി അഞ്ഞൂറിലധികം ആളുകൾക്ക് പുതിയ തൊഴിലവസരങ്ങൾ ലഭിക്കും. ഉപഭോക്തൃ സംസ്കാരത്തിലും ഡിജിറ്റൽ റീട്ടെയിൽ രംഗത്തും ഉണ്ടാകുന്ന മാറ്റങ്ങൾ ഉൾക്കൊണ്ടുകൊണ്ടുള്ള ലുലു ഗ്രൂപ്പിന്റെ ഇത്തരം മുൻനിര നിക്ഷേപങ്ങൾ വിപണിയിലെ തങ്ങളുടെ സ്വാധീനം വർദ്ധിപ്പിക്കുന്നതിനോടൊപ്പം വ്യവസായ മേഖലയ്ക്ക് ആകെ വലിയ ഉണർവ് നൽകുകയും ചെയ്യും.
More like this
