ഓണം വിപണിയിൽ മുന്നേറി കണ്ണൂർ ഹാൻവീവ്; ബാംബൂ ബെഡ്ഷീറ്റുകളും ആർട്ടിഫിഷ്യൽ കാഞ്ചീപുരം സാരികളും പുതിയ ആകർഷണം
കണ്ണൂർ: തിരുവോണ വിപണി ലക്ഷ്യമിട്ട് ആകർഷകമായ ഓഫറുകളോടെ കണ്ണൂരിന്റെ സ്വന്തം ഹാൻവീവ് (കേരള സ്റ്റേറ്റ് ഹാൻഡ്ലൂം ഡെവലപ്മെന്റ് കോർപ്പറേഷൻ) പൂർണ്ണസജ്ജമായി. തലമുറകളായി ജനങ്ങൾ നെഞ്ചിലേറ്റിയ കണ്ണൂർ കൈത്തറിയുടെ തനിമയും വിപണിയിലെ ആധുനിക മാറ്റങ്ങളും കോർത്തിണക്കി ഹാൻവീവ് അവതരിപ്പിച്ച വസ്ത്രശേഖരങ്ങൾക്ക് ഉപഭോക്താക്കൾക്കിടയിൽ വൻ വരവേൽപ്പാണ് ലഭിക്കുന്നത്. ജനപ്രിയതയിലും വിശ്വസ്തതയിലും എപ്പോഴും മുന്നിൽ നിൽക്കുന്ന ഹാൻവീവ് ഇത്തവണയും ജനങ്ങളുടെ ഒന്നാം തിരഞ്ഞെടുപ്പായി മാറിക്കഴിഞ്ഞു.
ബാംബൂ ഫൈബർ ഉൽപ്പന്നങ്ങളാണ് താരം
പരമ്പരാഗത കൈത്തറി ഉൽപ്പന്നങ്ങൾക്ക് പുറമെ നിരവധി പുതിയ നിർമ്മിതികൾ ഇത്തവണ ഹാൻവീവ് വിപണിയിലെത്തിച്ചിട്ടുണ്ട്. മുളയുടെ ഫൈബർ ഉപയോഗിച്ച് നിർമ്മിച്ച ബെഡ്ഷീറ്റുകളും ടവലുകളുമാണ് ഇതിൽ പ്രധാനം. പൊടിപടലങ്ങൾ കുറവായതിനാൽ ശ്വാസകോശ അലർജികൾ തടയുന്നതിനൊപ്പം, കൂടുതൽ തണുപ്പും ഉയർന്ന ജല ആഗിരണ ശേഷിയും നൽകുന്നവയാണ് ഈ ഉൽപ്പന്നങ്ങൾ.
തമിഴ്നാട് സർക്കാരുമായുള്ള സഹകരണവും കുറഞ്ഞ വിലയിലെ കാഞ്ചീപുരം സാരികളും
തമിഴ്നാട് സർക്കാരുമായി സഹകരിച്ച് ഇരു സംസ്ഥാനങ്ങളിലെയും തദ്ദേശീയ ഉൽപ്പന്നങ്ങൾ പരസ്പരം വിറ്റഴിക്കുന്ന പ്രത്യേക വിപണന പദ്ധതിക്ക് ഹാൻവീവ് തുടക്കമിട്ടു. സാധാരണ കാഞ്ചീപുരം സാരികൾക്ക് 15,000 മുതൽ 50,000 രൂപ വരെ വിലവരുമ്പോൾ, സിന്തറ്റിക് സിൽക്ക് ഉപയോഗിച്ച് നിർമ്മിച്ച കാഞ്ചീപുരം മോഡൽ സാരികൾ 2,000 രൂപയിൽ താഴെ വിലയിൽ ലഭ്യമാക്കിയിട്ടുണ്ട്. ആധുനിക വസ്ത്രസങ്കൽപ്പങ്ങൾക്ക് അനുയോജ്യമായ ‘പ്രൗഡി’ കുർത്തി മെറ്റീരിയലുകളും പ്രീമിയം വിഭാഗത്തിലുള്ള ‘ഒറ്റക്കൊമ്പൻ’ മുണ്ടും വിപണിയിലെ മറ്റ് പ്രധാന ആകർഷണങ്ങളാണ്.
ഹാൻഡ്ലൂം കോട്ടൺ ഉൽപ്പന്നങ്ങൾക്ക് പ്രിയം
കൈത്തറി മുണ്ടുകൾക്കും സാരികൾക്കും വിവിധതരം ബെഡ്ഷീറ്റുകൾക്കുമാണ് വിപണിയിൽ കൂടുതൽ ഡിമാന്റുള്ളത്. സിന്തറ്റിക്, പൊളിയസ്റ്റർ വസ്ത്രങ്ങൾ ശരീരത്തിനും ആരോഗ്യത്തിനും ഉണ്ടാക്കുന്ന ബുദ്ധിമുട്ടുകൾ ഒഴിവാക്കാൻ പൂർണ്ണമായും പരുത്തി അധിഷ്ഠിതമായ ഹാൻഡ്ലൂം ഉൽപ്പന്നങ്ങൾ തിരഞ്ഞെടുക്കുന്നവരുടെ എണ്ണം വർദ്ധിച്ചിട്ടുണ്ട്. കുട്ടികൾക്കായി റെഡിമേഡ് വസ്ത്രങ്ങളില്ലെങ്കിലും ഗുണമേന്മയുള്ള കോട്ടൺ ഡ്രസ്സിംഗ് മെറ്റീരിയലുകളും സ്കൂൾ യൂണിഫോം തുണിത്തരങ്ങളും ലഭ്യമാണ്.
പ്രതിസന്ധികൾ അതിജീവിച്ച് മുന്നോട്ട്
സംസ്ഥാന സർക്കാർ അനുവദിക്കുന്ന 56 ദിവസത്തെ റിബേറ്റ് ആനുകൂല്യങ്ങളിൽ ഏറ്റവും പ്രയോജനകരമായ 22 ദിവസത്തെ ഓണം റിബേറ്റ് വിൽപ്പനയാണ് നിലവിൽ പുരോഗമിക്കുന്നത്. ഇതിൽ പകുതിയോളം ദിവസങ്ങൾ പൂർത്തിയായി. കനത്ത മഴയും ഉൽപ്പന്നങ്ങളുടെ അപര്യാപ്തതയും തുടക്കത്തിൽ വിപണിയെ ബാധിച്ചിരുന്നു. കൂടാതെ, മൊത്തം തറികളിൽ 50 ശതമാനത്തോളം സ്കൂൾ കുട്ടികൾക്കുള്ള സൗജന്യ യൂണിഫോം തുണികളുടെ നിർമ്മാണത്തിനായി മാറ്റിവെച്ചതും തനത് ഉൽപ്പന്നങ്ങളുടെ ലഭ്യതയിൽ നേരിയ കുറവുവരുത്തി.
എങ്കിലും പ്രതിസന്ധികളെയെല്ലാം അതിജീവിച്ച്, ഗുണമേന്മയുള്ള ഉൽപ്പന്നങ്ങളുമായി കണ്ണൂർ കൈത്തറിയുടെ സന്ദേശം ജനങ്ങളിലേക്ക് എത്തിക്കാൻ ഹാൻവീവ് പൂർണ്ണമായി ഒരുങ്ങിക്കഴിഞ്ഞു. എക്കാലത്തെയും പോലെ ഇത്തവണയും ഉപഭോക്താക്കളുടെ പൂർണ്ണ പിന്തുണയോടെ തിരുവോണ വിപണിയിൽ മികച്ച മുന്നേറ്റം കുറിക്കുകയാണ് കണ്ണൂർ ഹാൻവീവ്.
More like this
