‘കേരള സ്റ്റോറി 2’ എന്ന ചിത്രത്തിനെതിരെ മുഖ്യമന്ത്രി പിണറായി വിജയൻ
ഉന്നയിച്ച വിമർശനങ്ങൾക്ക് മറുപടിയുമായി സംവിധായകൻ കാമാഖ്യ നാരായൺ സിംഗ് രംഗത്തെത്തി. ചിത്രം വ്യാജ പ്രചരണമാണെന്നും വിഷലിപ്തമായ സൃഷ്ടിയാണെന്നും മുഖ്യമന്ത്രി വിശേഷിപ്പിച്ചതിന് പിന്നാലെയാണ് സംവിധായകൻ തന്റെ നിലപാട് വ്യക്തമാക്കിയത്.
സിനിമ പറയുന്നത് പച്ചയായ സത്യമാണെന്നും രാജ്യത്തെ പെൺകുട്ടികളെയും സഹോദരിമാരെയും ഒരു കെണിയിൽ നിന്ന് രക്ഷിക്കാനുള്ള മുന്നറിയിപ്പാണ് ഇതെന്നും അദ്ദേഹം പറഞ്ഞു.രാജ്യത്തെ ജനസംഖ്യാപരമായ മാറ്റങ്ങൾ ലക്ഷ്യമിട്ട് പെൺകുട്ടികളെ പ്രണയത്തിൽ കുടുക്കുന്നത് രാജ്യത്തുടനീളം സംഭവിക്കുന്ന കാര്യമാണെന്ന് അദ്ദേഹം ആരോപിച്ചു. രാജ്യത്തെ സാഹചര്യം ജനങ്ങൾ അറിയേണ്ടതുണ്ട്. പെൺകുട്ടികൾ എങ്ങനെയാണ് ചതിക്കപ്പെടുന്നതെന്ന് സമൂഹത്തിന് മുന്നിൽ എത്തിക്കാനാണ് ഞങ്ങൾ ഈ സിനിമ നിർമ്മിച്ചതെന്നും അദ്ദേഹം കൂട്ടിച്ചേർത്തു.
സിനിമയും വിവാദ ട്രെയിലറും
കഴിഞ്ഞ ആഴ്ച പുറത്തിറങ്ങിയ ചിത്രത്തിന്റെ ട്രെയിലറിൽ, ഹൈന്ദവ പെൺകുട്ടികളെ പ്രണയത്തിൽ കുടുക്കി വിവാഹം കഴിക്കുന്നതും പിന്നീട് അവർ പീഡിപ്പിക്കപ്പെടുന്നതും മതം മാറ്റാൻ നിർബന്ധിക്കുന്നതുമായ രംഗങ്ങൾ ഉൾപ്പെടുത്തിയിരുന്നു. ട്രെയിലർ പുറത്തുവന്നതിന് പിന്നാലെ വലിയ രീതിയിലുള്ള പ്രതിഷേധങ്ങൾ ഉയർന്നിരുന്നു.
എന്നാൽ 2023-ൽ ഇറങ്ങിയ ചിത്രത്തിൻ്റെ ഒന്നാം ഭാഗത്തിന് ലഭിച്ച അതേ സ്വീകാര്യത രണ്ടാം ഭാഗത്തിനും ലഭിക്കുമെന്ന് കാമാഖ്യ നാരായൺ സിംഗ് പ്രത്യാശ പ്രകടിപ്പിച്ചു. സമൂഹത്തിൽ നടക്കുന്ന കാര്യങ്ങൾ കണ്ടില്ലെന്ന് നടിക്കാൻ കഴിയില്ലെന്നും സഹോദരിമാർ ഇത്തരം കെണികളിൽ അകപ്പെടാതിരിക്കാൻ ബോധവൽക്കരണം ആവശ്യമാണെന്നും അദ്ദേഹം പറഞ്ഞു.
സിനിമയെ വിമർശിക്കുന്നവർ കോടതി രേഖകൾ പരിശോധിക്കണമെന്നും യഥാർത്ഥ ഇരകളോട് സംസാരിക്കണമെന്നും സംവിധായകൻ ആവശ്യപ്പെട്ടു. ഇതൊരു ഡോക്യുമെന്ററി ഫിലിം മേക്കർ എന്ന നിലയിലുള്ള തന്റെ ഉത്തരവാദിത്തമാണെന്നും രാജ്യത്തിന്റെ ഘടന മാറ്റാനുള്ള ഗൂഢാലോചനയെക്കുറിച്ച് പെൺകുട്ടികൾ അറിഞ്ഞിരിക്കണമെന്നും അദ്ദേഹം പറഞ്ഞു.
സെൻട്രൽ ബോർഡ് ഓഫ് ഫിലിം സർട്ടിഫിക്കേഷൻ (CBFC) ചിത്രത്തിന് യു/എ സർട്ടിഫിക്കറ്റ് നൽകിയതിനെ അദ്ദേഹം സ്വാഗതം ചെയ്തു. ഇത് യുവാക്കൾക്കും കുടുംബങ്ങൾക്കും തിയേറ്ററിൽ വന്ന് സിനിമ കാണാൻ അവസരമൊരുക്കുമെന്നും അദ്ദേഹം പറഞ്ഞു.
മുഖ്യമന്ത്രി പിണറായി വിജയന്റെ നിലപാട്
അതേസമയം, ‘കേരള സ്റ്റോറി 2’ സംസ്ഥാനത്തിന്റെ മതേതര മൂല്യങ്ങൾക്ക് ഭീഷണിയാണെന്ന് മുഖ്യമന്ത്രി പിണറായി വിജയൻ ഫേസ്ബുക്കിലൂടെ പ്രതികരിച്ചിരുന്നു. മതസൗഹാർദ്ദത്തിന്റെ പാരമ്പര്യത്തെ തകർക്കാൻ ഇത്തരം സിനിമകൾ ശ്രമിക്കുന്നുവെന്ന് അദ്ദേഹം മുന്നറിയിപ്പ് നൽകി.
വിദ്വേഷം പടർത്താനും കേരള വിരുദ്ധ പ്രചരണം നടത്താനുമാണ് ആദ്യ ഭാഗം ശ്രമിച്ചതെന്ന് രാജ്യം തിരിച്ചറിഞ്ഞതാണെന്നും അദ്ദേഹം കൂട്ടിച്ചേർത്തു. പരസ്പര സമ്മതത്തോടെയുള്ള വിവാഹങ്ങളെപ്പോലും മതം മാറ്റമായി ചിത്രീകരിച്ച് വിഭജനം ഉണ്ടാക്കാനാണ് സിനിമ ശ്രമിക്കുന്നതെന്നും മുഖ്യമന്ത്രി വിമർശിച്ചു.
