കൊട്ടിയൂർ:പ്രശസ്തമായ കൊട്ടിയൂർ വൈശാഖോത്സവത്തിലെ ആദ്യ ആരാധനയായ ‘തിരുവോണം ആരാധന’ വെള്ളിയാഴ്ച നടക്കും. ഉത്സവത്തോടനുബന്ധിച്ച് നടക്കുന്ന നാല് പ്രധാന ആരാധനകളിൽ ആദ്യത്തേതാണിത്.
പ്രധാന ചടങ്ങുകൾ:
വെള്ളിയാഴ്ച (നാളെ): ഉച്ചയ്ക്ക് പൊന്നിൻ ശീവേലിയും ആരാധന സദ്യയും നടക്കും. സന്ധ്യയ്ക്കാണ് പ്രധാന ചടങ്ങായ ആരാധന പൂജ.
ഞായറാഴ്ച: പ്രശസ്തമായ ഇളനീർവെപ്പ് ചടങ്ങ് നടക്കും.
തിങ്കളാഴ്ച:ഇളനീരാട്ടവും അഷ്ടമി ആരാധനയും നടക്കും.
ഉത്സവ ചടങ്ങുകൾക്കായി അക്കരെ ക്ഷേത്രത്തിലെ മണിത്തറയിൽ താൽക്കാലിക ശ്രീകോവിലിന്റെ നിർമാണം ബ്രാഹ്മണ സ്ഥാനികരുടെ നേതൃത്വത്തിൽ പൂർത്തിയായിട്ടുണ്ട്. നിലവിൽ വൈശാഖോത്സവത്തിലെ നിത്യപൂജകൾ തടസ്സമില്ലാതെ തുടർന്നു വരുന്നു.
ക്ഷേത്രത്തിൽ വൻ ജനപ്രവാഹം
ഉത്സവത്തോടനുബന്ധിച്ച് കൊട്ടിയൂരിലേക്ക് ഭക്തരുടെ വൻ ഒഴുക്കാണ് അനുഭവപ്പെടുന്നത്. ബുധനാഴ്ച സ്ത്രീകളും കുട്ടികളുമടങ്ങുന്ന ആയിരക്കണക്കിന് തീർത്ഥാടകരാണ് കൊട്ടിയൂർ പെരുമാളെ ദർശിക്കാൻ എത്തിയത്. രാവിലെ മുതൽ അക്കരെ കൊട്ടിയൂരിൽ കനത്ത തിരക്കായിരുന്നു. മണിക്കൂറുകളോളം വരി നിന്നാണ് ഭക്തർ ദർശനം നടത്തിയത്. വൈകുന്നേരത്തോടെയാണ് തിരക്കിന് നേരിയ കുറവുണ്ടായത്.
