മുംബൈ: ആഗോള തലത്തിലെ ഭൗമ-രാഷ്ട്രീയ അനിശ്ചിതത്വങ്ങളും ക്രൂഡ് ഓയിൽ വിലയിലുണ്ടായ വർധനവും കാരണം കഴിഞ്ഞ വാരത്തിൽ ഇന്ത്യൻ ഓഹരി വിപണിയിൽ കനത്ത തകർച്ച. ബെഞ്ച്മാർക്ക് സൂചികയായ ബി.എസ്.ഇ സെൻസെക്സ് 2,091.68 പോയിന്റും (2.67%) എൻ.എസ്.ഇ നിഫ്റ്റി 566.85 പോയിന്റും (2.32%) ഇടിഞ്ഞു. വിപണിയിലെ ഈ അസ്ഥിരത പ്രമുഖ വ്യവസായി മുകേഷ് അംബാനിക്കും രാജ്യത്തെ മുൻനിര കമ്പനികൾക്കും കനത്ത തിരിച്ചടിയായി. വെറും അഞ്ച് ദിവസത്തിനുള്ളിൽ മുകേഷ് അംബാനിയുടെ ആസ്തിയിൽ 65,429.82 കോടി രൂപയുടെ ഇടിവാണ് രേഖപ്പെടുത്തിയത്. ഫോബ്സ് റിയൽ ടൈം ബില്യണയർ ഇൻഡെക്സ് അനുസരിച്ച് 86.5 ബില്യൺ ഡോളർ ആസ്തിയുള്ള അദ്ദേഹം നിലവിൽ ലോകത്തിലെ ശതകോടീശ്വരന്മാരുടെ പട്ടികയിൽ 23-ാം സ്ഥാനത്താണ്.
രാജ്യത്തെ ആദ്യ പത്ത് മുൻനിര കമ്പനികളിൽ ഒൻപതെണ്ണത്തിനും കഴിഞ്ഞ വാരം വൻ വിപണി മൂല്യ നഷ്ടം നേരിട്ടു. റിലയൻസ് ഇൻഡസ്ട്രീസ്, എച്ച്.ഡി.എഫ്.സി ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ, ബജാജ് ഫിനാൻസ്, എൽ.ഐ.സി, ഐ.സി.ഐ.സി.ഐ ബാങ്ക്, ഭാരതി എയർടെൽ, ടി.സി.എസ്, ലാർസൺ & ടുബ്രോ എന്നിവയ്ക്കാണ് തകർച്ചയുണ്ടായത്. റിലയൻസിന് മൂല്യമിടിവ് സംഭവിച്ചെങ്കിലും 17,49,418.94 കോടി രൂപയുടെ മാർക്കറ്റ് ക്യാപ്പുമായി ഇന്ത്യയിൽ ഒന്നാം സ്ഥാനത്ത് തുടരുന്നു. ആദ്യ പത്ത് കമ്പനികളിൽ 152.73 കോടി രൂപയുടെ വിപണി മൂല്യ വളർച്ചയോടെ നേട്ടമുണ്ടാക്കിയ ഏക സ്ഥാപനം ഹിന്ദുസ്ഥാൻ യൂണിലിവർ മാത്രമാണ്.
