ന്യൂഡൽഹി: നീറ്റ് പരീക്ഷാ ക്രമക്കേടിൽ രാജ്യത്തുടനീളം ഉയരുന്ന ജനരോഷവും പാർലമെന്റിലെ കടുത്ത പ്രതിഷേധങ്ങളും കണക്കിലെടുത്ത് വിഷയത്തിൽ ചർച്ചയ്ക്ക് സന്നദ്ധത അറിയിച്ച് കേന്ദ്ര സർക്കാർ. ലോക്സഭാ സ്പീക്കർ ഓം ബിർളയും പാർലമെന്ററി കാര്യ മന്ത്രി കിരൺ റിജിജുവുമാണ് സഭയിൽ എപ്പോൾ വേണമെങ്കിലും ചർച്ച നടത്താമെന്ന് വ്യക്തമാക്കിയത്. എന്നിരുന്നാലും, വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജി ആവശ്യത്തിൽ ഉറച്ചുനിൽക്കുന്ന പ്രതിപക്ഷം, മന്ത്രി സ്ഥാനത്ത് അദ്ദേഹം തുടരുന്നിടത്തോളം ചർച്ച കൊണ്ട് പ്രയോജനമില്ലെന്ന നിലപാടിലാണ്.
സഭ തടസ്സപ്പെട്ടതിനെത്തുടർന്ന് രാവിലെ നിർത്തിവെച്ച് പന്ത്രണ്ട് മണിക്ക് വീണ്ടും സമ്മേളിച്ചപ്പോഴാണ് സർക്കാർ ചർച്ചയ്ക്ക് തയ്യാറാണെന്ന കാര്യം പാർലമെന്ററി കാര്യ മന്ത്രി അറിയിച്ചത്. ചർച്ചയുടെ സമയവും ദൈർഘ്യവും എല്ലാ കക്ഷി നേതാക്കളുമായും ആലോചിച്ച് തീരുമാനിക്കുമെന്നും അദ്ദേഹം പറഞ്ഞു. സഭാ സമ്മേളനം തുടങ്ങിയതുമുതൽ സർക്കാരിന് ചർച്ചയ്ക്ക് മടിയില്ലായിരുന്നുവെന്നും എന്നാൽ പ്രതിപക്ഷം അനാവശ്യമായി ബഹളമുണ്ടാക്കി സഭ സ്തംഭിപ്പിക്കുകയായിരുന്നുവെന്നും മന്ത്രി ആരോപിച്ചു. അടിയന്തര പ്രമേയങ്ങൾ നിരന്തരം തള്ളിയ സ്പീക്കർ ഓം ബിർളയും സഭ നടക്കാത്തതിന് പ്രതിപക്ഷത്തെ കുറ്റപ്പെടുത്തി.
എന്നാൽ, കേന്ദ്രം ചർച്ചയ്ക്ക് തയ്യാറായെങ്കിലും പ്രതിഷേധത്തിൽ നിന്ന് പിന്മാറാൻ പ്രതിപക്ഷം ഒരുക്കമല്ല. ധർമ്മേന്ദ്ര പ്രധാന്റെ രാജിയില്ലാതെ ഒരു വിട്ടുവീഴ്ചയുമില്ലെന്ന് കെ. സി. വേണുഗോപാൽ എം.പി വ്യക്തമാക്കി. വിദ്യാർത്ഥികൾക്ക് നേരെയുണ്ടായ ലാത്തിച്ചാർജിനെ രൂക്ഷമായി വിമർശിച്ച അഖിലേഷ് യാദവ്, മന്ത്രി രാജിവെച്ചില്ലെങ്കിൽ സമരം തെരുവിലേക്ക് വ്യാപിപ്പിക്കുമെന്ന് മുന്നറിയിപ്പ് നൽകി.
അതിനിടെ, പ്രധാനമന്ത്രിയുടെ വസതി ഉപരോധിച്ച വേളയിൽ രാഹുൽ ഗാന്ധിക്ക് നേരെ പോലീസിന്റെ ഭാഗത്തുനിന്നുണ്ടായ അതിക്രമത്തിൽ പ്രതിഷേധിച്ച് കറുത്ത വസ്ത്രമണിഞ്ഞാണ് കോൺഗ്രസ് എം.പിമാർ പാർലമെന്റിൽ എത്തിയത്. ഇവർ പാർലമെന്റ് വളപ്പിൽ പ്രതിഷേധ പ്രകടനവും നടത്തി. അതേസമയം, രാഹുൽ ഗാന്ധിയുടെ നീക്കങ്ങളെ കടുത്ത ഭാഷയിൽ അപലപിച്ച ബി.ജെ.പി മന്ത്രിമാർ അദ്ദേഹത്തിനെതിരെ രാജ്യദ്രോഹക്കുറ്റത്തിന് കേസെടുക്കണമെന്ന് ആവശ്യപ്പെട്ടു.
