തിരുവനന്തപുരം: സംസ്ഥാനത്ത് ഈ വർഷത്തെ ഓണക്കിറ്റ് വിതരണവും ഓണച്ചന്തകളുടെ പ്രവർത്തനവും സംബന്ധിച്ച പ്രഖ്യാപനവുമായി ഭക്ഷ്യ വിതരണ മന്ത്രി അനൂപ് ജേക്കബ്. മഞ്ഞക്കാർഡ് ഉടമകൾക്കുള്ള ഓണക്കിറ്റ് ഓഗസ്റ്റ് 10 മുതൽ വിതരണം ചെയ്തു തുടങ്ങും. ഓണസദ്യക്ക് ആവശ്യമായ 16 ഇനം സാധനങ്ങളാണ് കിറ്റിൽ ഉൾപ്പെടുത്തിയിരിക്കുന്നത്. അതിനു മുന്നോടിയായി ഓഗസ്റ്റ് 8 മുതൽ ഓണച്ചന്തകളും ഓഗസ്റ്റ് 6 മുതൽ ഓണം ട്രേഡ് ഫെയറുകളും ആരംഭിക്കും.
സംസ്ഥാനത്ത് വലിയ രീതിയിലുള്ള വിലക്കയറ്റം നിലനിൽക്കുന്ന സമയത്താണ് സർക്കാരിന്റെ ഈ ആശ്വാസ നടപടി. അടുത്ത വർഷം മുതൽ കൂടുതൽ വിഭാഗങ്ങളിലേക്ക് ഓണക്കിറ്റ് വിതരണം വ്യാപിപ്പിക്കുമെന്ന് മന്ത്രി വ്യക്തമാക്കി. ഇതിനുപുറമേ, സപ്ലൈകോ ഔട്ട്ലെറ്റുകൾ വഴി നൽകുന്ന സബ്സിഡി നിരക്കിലുള്ള 13 ഇനം അവശ്യസാധനങ്ങളുടെ ലഭ്യതയും ഉറപ്പാക്കും.
അതിനിടെ, കടുത്ത സാമ്പത്തിക പ്രതിസന്ധി മുൻനിർത്തി വരാനിരിക്കുന്ന ബജറ്റ് മുൻകൊരുക്കങ്ങളുടെ ഭാഗമായി ചെലവുകൾ ചുരുക്കാൻ ധനവകുപ്പ് വിവിധ വകുപ്പുകൾക്ക് നിർദ്ദേശം നൽകിയിട്ടുണ്ട്. പുതുക്കിയ എസ്റ്റിമേറ്റ് തുക ബജറ്റ് വിഹിതത്തേക്കാൾ കൂടരുത്, ലാഭകരമല്ലാത്ത പദ്ധതികളും മാറ്റിവെക്കാവുന്ന അറ്റകുറ്റപ്പണികളും ഒഴിവാക്കണം തുടങ്ങിയവയാണ് പ്രധാന നിർദ്ദേശങ്ങൾ. തസ്തികകൾ അധികമുള്ള ജീവനക്കാരെ പിരിച്ചുവിടാതെ പുതിയ ഒഴിവുകളിലേക്ക് പുനർവിന്യസിക്കുമെന്നും ധനവകുപ്പിന്റെ സർക്കുലറിൽ വ്യക്തമാക്കുന്നു.
