പാണക്കാട് മണ്ണിടിച്ചിൽ: ഉദ്യോഗസ്ഥർക്ക് ഗുരുതര വീഴ്ചയെന്ന് മന്ത്രി കുഞ്ഞാലിക്കുട്ടി; ജില്ലയിലുടനീളം അനധികൃത ക്വാറികൾക്ക് നിരോധനം
മലപ്പുറം: പാണക്കാട്ടുണ്ടായ വൻ മണ്ണിടിച്ചിലിന് കാരണം അനധികൃത പാറ പൊട്ടിക്കലാണെന്നും ഇതിൽ വീഴ്ച വരുത്തിയ ജിയോളജി വകുപ്പ് ഉദ്യോഗസ്ഥർക്കെതിരെ കർശന നടപടിയുണ്ടാകുമെന്നും മന്ത്രി പി.കെ. കുഞ്ഞാലിക്കുട്ടി അറിയിച്ചു. അപകടമുണ്ടായ പ്രദേശം നേരിട്ട് സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
മണ്ണ് നീക്കം ചെയ്യാനെന്ന പേരിൽ മുൻസിപ്പാലിറ്റിയുടെ അനുമതി വാങ്ങിയ ശേഷം അതിൻ്റെ മറവിൽ അനധികൃതമായി പാറ പൊട്ടിച്ചതാണ് അപകടത്തിന് ഇടയാക്കിയത്. മുൻപ് നാട്ടുകാർ ഇടപെട്ട് നിർത്തിവെപ്പിച്ച കളി വീണ്ടും പുനരാരംഭിക്കുകയായിരുന്നു. സംഭവത്തിൽ ജിയോളജി ഉദ്യോഗസ്ഥർക്കും സ്ഥലമുടമയ്ക്കും കാരണം കാണിക്കൽ നോട്ടീസ് നൽകിയിട്ടുണ്ട്. ദുരന്തത്തിൻ്റെ പശ്ചാത്തലത്തിൽ സംസ്ഥാനത്ത് അനധികൃതമായി പ്രവർത്തിക്കുന്ന എല്ലാ ക്വാറികളുടെയും പ്രവർത്തനം പൂർണമായി തടയാൻ നിർദേശം നൽകിയതായും ജനങ്ങളുടെ ജീവനും സ്വത്തിനും ഭീഷണിയാകുന്ന ഒരു നീക്കവും വെച്ചുപൊറുപ്പിക്കില്ലെന്നും മന്ത്രി വ്യക്തമാക്കി.
സ്വകാര്യ വ്യക്തി നിർമാണത്തിനായി മണ്ണുമാന്തിയ സ്ഥലത്തുണ്ടായ മണ്ണിടിച്ചിലിൽ പൊലീസുകാരും മാധ്യമപ്രവർത്തകരും നാട്ടുകാരും തലനാരിഴയ്ക്കാണ് രക്ഷപ്പെട്ടത്. സ്ഥലം സന്ദർശിച്ച ജില്ലാ കളക്ടർ, വിദഗ്ധ സമിതിയുടെ റിപ്പോർട്ട് ലഭിച്ച ശേഷം ഈ പ്രദേശത്തെ പരിസ്ഥിതി ലോല മേഖലയായി പ്രഖ്യാപിക്കുന്നതിൽ തീരുമാനമെടുക്കുമെന്നും അറിയിച്ചു.
More like this
