മാന്ദ്യം വരുന്നു…എഐ ലക്ഷകണക്കിന് ജോലി അപഹരിക്കുമെന്ന് വിദഗ്ധര്‍

ബള്‍ഗേറിയന്‍ മിസ്റ്റിക് ബാബ വാംഗയും, റിച്ച് ഡാഡ് പുവര്‍ ഡാഡ് എഴുത്തുകാരന്‍ റോബര്‍ട്ട് കിയോസ്‌കിയും മറ്റും വര്‍ഷങ്ങള്‍ക്കു മുമ്പ് നടത്തിയ ആ പ്രവചനം യാഥാര്‍ഥ്യത്തോട് അടുക്കുന്നുവെന്ന് പുതുതലമുറ വിപണി വിദഗ്ധരും. ചരിത്രത്തിലെ ഏറ്റവും വലിയ സാമ്പത്തിക തകര്‍ച്ചയിലേയ്ക്കാണ് ലോകം നീങ്ങുന്നത്. ഈ മാന്ദ്യം ആദ്യം അമേരിക്കയെ ബാധിക്കുമെന്നും, പിന്നീട് യൂറോപ്പിലേക്കും, ഏഷ്യയിലേക്കും വ്യാപിക്കുമെന്നും വിദഗ്ധര്‍ വിശ്വസിക്കുന്നു.

വരാനിരിക്കുന്ന മാന്ദ്യം തയ്യാറടെത്തിരിക്കുന്ന കുറച്ചു ആളുകളെ കൂടുതല്‍ സമ്പന്നരാക്കി മാറ്റുമെന്നും, എന്നാല്‍ ലക്ഷകണക്കിന് ആളുകള്‍ക്ക് എല്ലാം നഷ്ടപ്പെടാന്‍ വഴിയൊരുക്കുമെന്നും കിയോസ്‌കി പറഞ്ഞു. എഐ ലക്ഷകണക്കിന് ആളുകളുടെ ജോലികള്‍ അപഹരിക്കും. ജോലികള്‍ അപ്രത്യക്ഷമാകുന്നതോടെ ഓഫീസ്, റെസിഡന്‍ഷ്യല്‍ റിയല്‍ എസ്റ്റേറ്റ് പ്രവര്‍ത്തനങ്ങള്‍ താളം തെറ്റും. വിപണികള്‍ തകരും.

ഫിയറ്റ് കറന്‍സികള്‍ വെറും പേപ്പറുകള്‍ മാത്രമായി മാറുമെന്നും നിക്ഷേപകര്‍ സ്വര്‍ണ്ണം, വെള്ളി, ബിറ്റ്‌കോയിന്‍, എതെറിയം പോലുള്ള നിക്ഷേപ മാധ്യമങ്ങള്‍ സ്വീകരിക്കണമെന്നും വിദഗ്ധര്‍ പറയുന്നു. വെള്ളിയെ ആണ് കിയോസ്‌കി ഏറ്റവും മികച്ച മാധ്യമായി കാണുന്നത്. 2026 ഓടെ ആഗോള വെള്ളി വില 200 ഡോളറില്‍ എത്തുമെന്ന് അദ്ദേഹം വിശ്വസിക്കുന്നു. അതായത് നിലവിലെ വിലയേക്കാള്‍ നാലിരട്ടി കൂടുതല്‍. വെള്ളിയുടെ ഹ്രസ്വകാല ലക്ഷ്യം 70 ഡോളര്‍ ആയിരിക്കും

പ്രസ്തുത മാന്ദ്യത്തെ ഡിജിറ്റല്‍ കറന്‍സിയായ ബിറ്റ്‌കോയിന്‍ അതിജീവിക്കുമെന്നും കിയോസ്‌കി പറയുന്നു. അതെ, ഒരു രാജ്യത്തിന്റെയോ, കേന്ദ്ര ബാങ്കിന്റെയോ പിന്തുണ ഇല്ലാത്ത ഡിജിറ്റല്‍ കറന്‍സിയിലാണ് കിയോസ്‌കി നേട്ടം കാണുന്നത്. കുറച്ച് ദിവസങ്ങള്‍ക്ക് മുമ്പ് താന്‍ 90,000 ഡോളര്‍ നിരക്കില്‍ 2.25 മില്യണ്‍ ഡോളര്‍ മൂല്യം വരുന്ന 25 ബിറ്റ്‌കോയിനുകള്‍ വിറ്റതായി കിയോസ്‌കി വെളിപ്പെടുത്തി. ഒരു ബിറ്റ്‌കോയിന് 6000 ഡോളര്‍ നിരക്കിലാണ് അദ്ദേഹം അവ വാങ്ങിയത്.

അയായത് ബിറ്റ്‌കോയിനില്‍ നിന്ന് അദ്ദേഹത്തിന് ലഭിച്ച നേട്ടം 1,500 ശതമാനത്തില്‍ കൂടുതലാണ്. ബിറ്റ്‌കോയിനിന്റെ നിലവിലെ തിരുത്തല്‍ ഒരു വാ്ങ്ങല്‍ അവസരമായി വിദഗ്ധര്‍ കാണുന്നു. അടുത്തിടെ ബിറ്റ്‌കോയിന്റെ വില എക്കാലത്തെയും ഉയര്‍ന്ന നിരക്കായ 126,198.07 ഡോളറില്‍ നിന്ന് 80,659.81 ഡോളറിലേയ്ക്ക് വീണിരുന്നു. അതായത് 35 ശതമാനത്തിലധികം ഇടിഞ്ഞു.