കണ്ണൂര്: ഗോവിന്ദച്ചാമി ജയില് ചാടാന് നടത്തിയത് മാസങ്ങള് നീണ്ട ആസൂത്രണം. പൊലീസ് ചോദ്യം ചെയ്യലിലെ വിവരങ്ങള് പുറത്ത്. സെല്ലിന്റെ കമ്പികള് നേരത്തെ മുറിച്ച് തുടങ്ങിയിരുന്നുവെന്നും ജയില് അധികൃതര്ക്ക് മനസിലാകാതിരിക്കാന് കമ്പിയില് നൂല് കെട്ടിവെച്ചുവെന്നും പ്രതി മൊഴി നല്കി.
സെല്ലിന്റെ കമ്പിയുടെ താഴ്ഭാഗമാണ് മുറിച്ചത്. ജയില് മോചിതരായാവരുടെ തുണികള് ശേഖരിച്ചു വെച്ചു. കുളിക്കാനുള്ള വെള്ളം ശേഖരിക്കുന്ന ടാങ്ക് വഴി ക്വാറന്റൈന് ബ്ലോക്കിലെത്തി. തുടര്ന്ന് പ്ലാസ്റ്റിക് ഡ്രമ്മിന്റെ മുകളില് കയറി ഫെന്സിങ്ങിന്റെ തൂണില് കുടുക്കിട്ടുവെന്നും പ്രതി മൊഴി നല്കി. ബ്ലെയ്ഡ് ലഭിച്ചത് ജയില് അടുക്കളയിലെ ജോലിക്ക് പോയ അന്തേവാസിയിലൂടെയെന്നും വെളിപ്പെടുത്തി.
അരിഭക്ഷണം ഒഴിവാക്കി ശരീര ഭാരം കുറച്ചു. മാസങ്ങളായി വ്യായാമം ചെയ്തു. ചോറ് കഴിച്ചിരുന്നില്ല. ഡോക്ടറുടെ അടുത്തുനിന്ന് എഴുതി വാങ്ങി ചപ്പാത്തി മാത്രം കഴിച്ചു. ശരീരഭാരം പകുതിയായി കുറച്ചു. ജയില് കമ്പി കട്ട് ചെയ്യാനുള്ള ആയുധം നേരത്തെ എത്തിച്ചു.
ഇന്ന് സെല്ലില് നിന്ന് പുറത്തിറങ്ങിയത് 1.15 ഓടെയാണ്. ചുവരിനോട് ചേര്ന്നായിരുന്നു കിടന്നുറങ്ങിയത്. പുതച്ചുമൂടിയാണ് കിടന്നത്. കൊതുകുവലയും ഉണ്ടായിരുന്നു. ഗോവിന്ദച്ചാമി കിടന്ന പത്താം ബ്ലോക്കിലെ സെല്ലില് വെളിച്ചമില്ല. 1.10-ന് ഒരു വാര്ഡന് വന്ന് ടോര്ച്ചടിച്ച് നോക്കിയപ്പോള് പുതച്ചുമൂടിയ നിലയില് രൂപമുണ്ടായിരുന്നു
സെല്ലിലെ രണ്ട് കമ്പികള് മുറിച്ചാണ് ഇയാള് പുറത്തുകടന്നത്. താഴത്തെ കമ്പികളാണ് മുറിച്ചത്. ജയിലില് നിര്മാണ പ്രവര്ത്തനങ്ങള് നടക്കുന്നുണ്ട്. അവിടെനിന്നും ഹാക്സോ ബ്ലേഡ് സംഘടിപ്പിച്ചു. ദിവസങ്ങളായി കുറച്ച് കുറച്ചായി കമ്പികള് മുറിക്കാനുളള ശ്രമം നടത്തിയിരുന്നു.
