കൊച്ചിയിലെയും കോഴിക്കോട്ടെയും കോറോ ഹെൽത്ത് സ്ഥാപനങ്ങളിൽ നടന്ന കൂട്ടപ്പിരിച്ചുവിടൽ പ്രതിസന്ധിക്ക് ഒടുവിൽ ശുഭകരമായ പരിഹാരമായി. കമ്പനി അധികൃതരുമായി നടത്തിയ നിർണായക ചർച്ച വിജയം കണ്ടതായും തൊഴിലാളികൾക്ക് ആകെ ഏഴ് മാസത്തെ ശമ്പളം നൽകാൻ ധാരണയായതായും മന്ത്രി ബിന്ദു കൃഷ്ണ അറിയിച്ചു. മുൻപ് നൽകിയ രണ്ട് മാസത്തെ വേതനത്തിന് പുറമെ, അഞ്ച് മാസത്തെ ശമ്പളം കൂടി അധികമായി ജീവനക്കാർക്ക് നൽകാനാണ് ചർച്ചയിൽ തീരുമാനമായിട്ടുള്ളത്. ഈ തുക വരുന്ന 26-ാം തീയതിക്ക് മുൻപായി തൊഴിലാളികൾക്ക് കൈമാറുമെന്നും മന്ത്രി വ്യക്തമാക്കി.
തൊഴിലാളികൾക്ക് മറ്റ് തൊഴിലവസരങ്ങൾ കണ്ടെത്തുന്നതിന് ആവശ്യമായ എക്സ്പീരിയൻസ് സർട്ടിഫിക്കറ്റ്, ലീവിങ് സർട്ടിഫിക്കറ്റ് ഉൾപ്പെടെയുള്ള എല്ലാ ഔദ്യോഗിക രേഖകളും കമ്പനി തന്നെ ലഭ്യമാക്കും. ഐഎൻടിയുസി സംസ്ഥാന പ്രസിഡന്റ് ആർ. ചന്ദ്രശേഖരനും പങ്കെടുത്ത ചർച്ചയിലെ ഈ തീരുമാനങ്ങളിൽ കോറോ ഹെൽത്തിലെ ജീവനക്കാർ പൂർണ്ണ സംതൃപ്തി രേഖപ്പെടുത്തിയിട്ടുണ്ട്. ലഭ്യമാക്കാവുന്നതിൽ വെച്ച് ഏറ്റവും മികച്ച പരിഹാരമാണ് ഇതെന്ന് വ്യക്തമാക്കിയ തൊഴിലാളികൾ, സർക്കാരിന്റെ ശക്തമായ ഇച്ഛാശക്തിയാണ് ഈ വിജയത്തിന് പിന്നിലെന്നും കൂട്ടിച്ചേർത്തു. അഞ്ച് മാസത്തെ ശമ്പളം ഒരുമിച്ച് ലഭിക്കുന്നത് വഴി പുതിയ ജോലികൾ കണ്ടെത്താൻ തങ്ങൾക്ക് ആവശ്യമായ സമയം ലഭിക്കുമെന്ന ആശ്വാസത്തിലാണ് ജീവനക്കാർ.
