കോട്ടയം: ഗുരുവായൂര്‍- മധുര എക്സ്പ്രസില് യാത്ര ചെയ്യുകയായിരുന്ന ആള്‍ക്ക് പാമ്പുകടിയേറ്റു. തെങ്കാശി സ്വദേശി കാര്‍ത്തിക്കിനാണ് (23) പാമ്പുകടിയേറ്റത്. പാമ്പാണോ എലിയാണോ ഇയാളെ കടിച്ചത് എന്നത് സംബന്ധിച്ച് സംശയമുണ്ടായിരുന്നു. യാത്രികനെ കടിച്ചത് പാമ്പാണെന്ന് കാര്‍ത്തിയെ ചികിത്സിച്ച കോട്ടയം മെഡിക്കല്‍ കോളേജ് അധികൃതരാണ് സ്ഥിരീകരിച്ചത്.
ഗുരുവായൂരില്‍ നിന്ന് മധുരയിലേക്ക് പോകുകയായിരുന്ന ട്രെയിനില്‍ കാര്‍ത്തിയ്ക്ക് എറണാകുളം കഴിഞ്ഞപ്പോഴാണ് പാമ്പിന്റെ കടിയേറ്റതെന്നാണ് പ്രാഥമിക വിവരം. ട്രയിന്‍ ഏറ്റുമാനൂരിലെത്തിയപ്പോഴാണ് കാര്‍ത്തിയെ ആമ്പുലന്‍സില്‍ കോട്ടയം മെഡിക്കല്‍ കോളേജില്‍ കൊണ്ടുപോയത്. തീവ്ര പരിചരണ വിഭാഗത്തില്‍ പരിശോധനയിലായിരുന്ന കാര്‍ത്തിയെ വാര്‍ഡിലേക്ക് മാറ്റി.
ബോഗിയിലുണ്ടായിരുന്ന മുഴുവന്‍ യാത്രക്കാരെയും പുറത്തേക്കിറക്കി പരിശോധന നടത്തിയെങ്കിലും പാമ്പിനെ കണ്ടെത്താനായില്ലെന്നാണ് റെയില്‍വേ പോലീസ് അറിയിച്ചത്.
