ഇന്ത്യൻ ഓഹരി വിപണിയിൽ സമീപ കാലത്തായി ഐ.പി.ഒകളുടെ പ്രവാഹമാണ് ഉണ്ടായിക്കൊണ്ടിരിക്കുന്നത്. റീടെയിൽ നിക്ഷേപകരുടെ വർധിച്ച താല്പര്യമാണ് പുതിയ ട്രെൻഡ്. എന്നാൽ ഉയർന്ന റീടെയിൽ സബ്സ്ക്രിപ്ഷൻ ലഭിച്ച ചില ഐ.പി.ഒകൾ ലിസ്റ്റിങ്ങിന് ശേഷം കുറഞ്ഞ കാലം കൊണ്ട് മോശം പ്രകടനം നടത്തി നിക്ഷേപകരെ നിരാശപ്പെടുത്തുകയും ചെയ്തു. ഇത്തരത്തിൽ കഴിഞ്ഞ 3 മാസത്തിൽ 36% വരെ താഴ്ച്ചയിൽ, നിക്ഷേപകരെ ‘ട്രാപ്പിൽ’ ആക്കിയ ചില ഐ.പി.ഒകൾ സംബന്ധിച്ച വിവരങ്ങളാണ് ഇവിടെ കൊടുത്തിട്ടുള്ളത്.കഴിഞ്ഞ മാസങ്ങളിൽ, പ്രധാനമായും പല മിഡ്ക്യാപ് ഐ.പി.ഒകളിലേക്കും റീടെയിൽ നിക്ഷേപകർ ഒഴുകിയെത്തി. എന്നാൽ പല ഓഹരികളും പെട്ടെന്നു തന്നെ ഇഷ്യു വിലയേക്കാൾ താഴേക്ക് പതിക്കാൻ തുടങ്ങി. ഇതോടെ റീടെയിൽ പങ്കാളിത്തം വർധിക്കുന്നത് റിസ്ക് ഫാക്ടർ ഉയർത്തുമെന്ന പ്രതീതി പോലും ജനിപ്പിച്ചതായി അനലിസ്റ്റുകൾ പറയുന്നു. നിക്ഷേപകരുടെ അമിത പ്രതീക്ഷയേക്കാളുപരി കമ്പനിയുടെ അടിസ്ഥാനത്തിനാണ് പ്രാധാന്യമെന്ന പാഠമാണ് ഇതിൽ പല ഐ.പി.ഒകളും ബാക്കി വെക്കുന്നത്
1. ദേവ് ആക്സിലറേറ്റർ (Dev Accelerator)
164.7 മടങ്ങ് എന്ന തോതിൽ ഭീമമായ റീടെയിൽ സബ്സ്ക്രിപ്ഷനാണ് ഈ ഐ.പി.ഒയ്ക്ക് ലഭിച്ചത്. എന്നാൽ ലിസ്റ്റിങ്ങിന് ശേഷം ഇതു വരെ 30 ശതമാനത്തിലധികം താഴ്ച്ചയാണ് ഓഹരി വിലയിലുണ്ടായത്.
2. ഹൈവേ ഇൻഫ്രാസ്ട്രക്ചർ (Highway Infrastructure)
ഈ ഐ.പി.ഒയിൽ 115.6 മടങ്ങ് എന്ന നിലയിലാണ് റീടെയിൽ ഓവർ സബ്സ്ക്രിപ്ഷൻ ഉണ്ടായത്. ‘ഇൻഫ്ര’ എന്ന തീം ഇതിനൊരു കാരണമായിരുന്നു. ഓഹരി 64% ലിസ്റ്റിങ് നേട്ടം നൽകുകയും ചെയ്തു. എന്നാൽ പിന്നീട് -3.46% എന്ന നെഗറ്റീവ് റിട്ടേണിലേക്കാണ് ഓഹരി എത്തി നിൽക്കുന്നത്. തീമാറ്റിക് റാലികളിലെ അസ്ഥിരതയാണ് ഇതിനൊരു കാരണമെന്ന് വിലയിരുത്തപ്പെടുന്നു
3. റെഗാൽ റിസോഴ്സസ് (Regaal Resources)
റീടെയിൽ നിക്ഷേപകരുടെ ഈ ഐ.പി.ഒയിലെ സബ്സ്ക്രിപ്ഷൻ 57.7 മടങ്ങ് അധികമായിരുന്നു. മൈനിങ്, കമ്മോഡിറ്റി സെ്കടറിലെ ഉയർച്ചാ സാധ്യതകളാണ് പ്രതീക്ഷ പകർന്നത്. ഓഹരി 38% ലിസ്റ്റിങ് നേട്ടം നൽകിയെങ്കിലും, നിലവിൽ -15.19% എന്ന തോതിൽ നെഗറ്റീവ് റിട്ടേൺ എന്ന നിലയിലെത്തിയിരിക്കുന്നു. സെക്ടറിന്റെ സൈക്ലിക്കൽ റിസ്ക്, ലാഭമെടുപ്പിനെ തുടർന്നുണ്ടായ സമ്മർദ്ദങ്ങൾ തുടങ്ങിയവ കാരണങ്ങളായി വിലയിരുത്തപ്പെടുന്നു
4. അമാന്ത ഹെൽത്ത് കെയർ (Amanta Healthcare)
55 മടങ്ങ് ഓവർ സബ്സ്ക്രിപ്ഷനാണ് കമ്പനിക്ക് ലഭിച്ചത്. എന്നാൽ ഇതു വരെ -8.9% എന്ന തോതിൽ നെഗറ്റീവ് റിട്ടേണാണ് ഓഹരി നൽകിയത്. ശക്തമായ വ്യാഖ്യാനങ്ങൾ വാല്യുവേഷനെ പിന്തുണയ്ക്കില്ലെന്ന യാഥാർത്ഥ്യമാണ് ഇതിന് കാരണമായി അനലിസ്റ്റുകൾ ചൂണ്ടിക്കാണിക്കുന്നത്
5. സോളാർ വേൾഡ് എനർജി സൊല്യൂഷൻസ് (Solarworld Energy Solutions)
49.1 മടങ്ങ് അധിക സബ്സ്ക്രിപ്ഷനാണ് ഈ ഐ.പി.ഒയ്ക്ക് ലഭിച്ചത്. ‘റിന്യൂവബിൾ എനർജി ബൂം’ എന്ന പ്രതീക്ഷയാണ് പ്രധാന കാരണം. 10.7% ലിസ്റ്റിങ് നേട്ടം നൽകിയെങ്കിലും നിലവിൽ -14.09% എന്ന നെഗറ്റീവ് റിട്ടേണിലേക്കാണ് ഓഹരി എത്തി നിൽക്കുന്നത്
6. വി.എം.എസ് ടി.എം.ടി (VMS TMT)
റീടെയിൽ നിക്ഷേപകരുടെ ഭാഗത്ത് നിന്ന് 47.9 മടങ്ങ് അധിക സബ്സ്ക്രിപ്ഷനാണ് കമ്പനിക്ക് ലഭിച്ചത്. 6% എന്ന ചെറിയ ലിസ്റ്റിങ് നേട്ടം നൽകിയെങ്കിലും 36% വരെ ഇടിവാണ് പിന്നീട് ഓഹരിയിലുണ്ടായത്. ഈ ലിസ്റ്റിൽ കൂടുതൽ നഷ്ടം നേരിട്ടതും ഈ ഓഹരിയാണ്
റീടെയിൽ നിക്ഷേപകർ ശ്രദ്ധിക്കേണ്ട കാര്യങ്ങൾ
മുകളിൽ പ്രതിപാദിച്ച 3 മാസത്തെ കണക്കുകൾ ഒരു കാര്യം വ്യക്തമാക്കുന്നു, റീടെയിൽ-ഹെവി സബ്സ്ക്രിപ്ഷനുകൾ ലിസ്റ്റിങ്ങിന് ശേഷമുള്ള നേട്ടം ഉറപ്പ് നൽകുന്നില്ല. ഇവിടെ ആൾക്കൂട്ടത്തിന്റെ കണക്കുകൾക്കും, ഐ.പി.ഒ ഹൈപ്പിനും ഉപരിയായി കമ്പനിയുടെ അടിസ്ഥാനം, പ്രൈസിങ്, സെക്ടറിന്റെ കരുത്ത് തുടങ്ങിയവയാണ് പ്രാധാന്യത്തോടെ പരിഗണിക്കേണ്ടതെന്ന് അനലിസ്റ്റുകൾ നിർദ്ദേശിക്കുന്നു
