സംസ്ഥാനതല കർഷകദിനാഘോഷം ഓഗസ്റ്റ് 17-ന് കളമശ്ശേരിയിൽ; മുഖ്യമന്ത്രി ഉദ്ഘാടനം ചെയ്യും
കൊച്ചി: ഇത്തവണത്തെ സംസ്ഥാനതല കർഷകദിനാഘോഷം ഓഗസ്റ്റ് 17-ന് കളമശ്ശേരി ആഷിസ് കൺവെൻഷൻ സെന്ററിൽ നടക്കും. സംസ്ഥാനതല ഉദ്ഘാടനം മുഖ്യമന്ത്രി നിർവഹിക്കുമെന്ന് കൃഷിവകുപ്പ് മന്ത്രി മാധ്യമങ്ങളോട് വ്യക്തമാക്കി. അന്താരാഷ്ട്ര വനിതാ കർഷക വർഷാചരണത്തിന്റെ ഭാഗമായി വലിയ പ്രാധാന്യത്തോടെയാണ് ഈ വർഷത്തെ പരിപാടികൾ ആസൂത്രണം ചെയ്തിരിക്കുന്നത്. കൃഷി മേഖലയിൽ സ്ത്രീകളുടെ പങ്കാളിത്തം ഉറപ്പാക്കുന്നതിനും പുതിയ തലമുറയെ കാർഷിക വൃത്തിയിലേക്ക് ആകർഷിക്കുന്നതിനുമുള്ള മുൻകൈകൾ ആഘോഷത്തിന്റെ ഭാഗമായി ഉണ്ടാകും.
കേന്ദ്ര-സംസ്ഥാന മന്ത്രിമാരും എം.പിമാരും ജനപ്രതിനിധികളും കാർഷിക വിദഗ്ധരും ചടങ്ങിൽ വിശിഷ്ടാതിഥികളായി പങ്കാളികളാകും. കാർഷിക രംഗത്തെ മികച്ച സേവനങ്ങളെ മാനിച്ച് 38 വ്യത്യസ്ത വിഭാഗങ്ങളിലായി പുരസ്കാരങ്ങൾ വിതരണം ചെയ്യും. ഈ വർഷം മുതൽ പുതുതായി ഏർപ്പെടുത്തിയ 5 ലക്ഷം രൂപ സമ്മാനത്തുകയുള്ള ‘ശ്രീ ഉമ്മൻ ചാണ്ടി സ്മാരക സമഗ്ര സംഭാവന പുരസ്കാരം’, ‘മികച്ച മട്ടുപ്പാവ് കർഷകൻ’, ‘ഉദ്യാന ശ്രേഷ്ഠ’ എന്നീ അവാർഡുകൾ പ്രധാന ആകർഷണമാണ്.
ഉദ്ഘാടനത്തോടനുബന്ധിച്ച് കാർഷിക സാങ്കേതികവിദ്യകളും ഉൽപന്നങ്ങളും ഉൾപ്പെടുത്തിയുള്ള വിപുലമായ പ്രദർശനവും ഒരുക്കുന്നുണ്ട്. ജി.ഐ. പദവിയുള്ള വിഭവങ്ങൾ, കേരള ഗ്രോ ഉൽപന്നങ്ങൾ, മൂല്യവർധിത വസ്തുക്കൾ, യന്ത്ര സാങ്കേതികവിദ്യകൾ എന്നിവ പ്രദർശനത്തിലുണ്ടാകും. കൂടാതെ, സംസ്ഥാനത്തെ മുഴുവൻ കൃഷിഭവനങ്ങളിലും കർഷകദിനാഘോഷങ്ങൾ സംഘടിപ്പിക്കുമെന്നും മന്ത്രി അറിയിച്ചു.
More like this
