ഇന്ത്യയിലെ ഏറ്റവും മികച്ച ഐടി കമ്പനികളില് ഒന്നായ ടാറ്റ കണ്സള്ട്ടന്സി സര്വീസസ് (ടിസിഎസ്), ആഗോള എഐ വമ്പന്മാരായ ഓപ്പണ്എഐയുമായി സഹകരിച്ചേക്കുമെന്ന് സൂചന. ഇന്ത്യയില് അടുത്ത തലമുറ എഐ കമ്പ്യൂട്ടിംഗ് വിപ്ലവം കൊണ്ടുവരികയെന്നതാണ് ലക്ഷ്യം. ടാറ്റ- ചാറ്റ്ജിപിടി കൂട്ടുക്കെട്ട് ഇന്ത്യയ്ക്ക് വമ്പന് പ്രതീക്ഷയാകുമെന്നു വിദഗ്ധര് പറയുന്നു. ഇരുകമ്പനികള്ക്കുമിടയില് പ്രസ്തുത വിഷയത്തില് ചര്ച്ചകള് പുരോഗമിക്കുന്നുവെന്ന് റിപ്പോര്ട്ടുകള് കൂട്ടിച്ചേര്ക്കുന്നു
.എന്താണ് പദ്ധതി?
ഇന്ത്യയില് വലിയ തോതിലുള്ള കമ്പ്യൂട്ടിംഗ് ഇന്ഫ്രാസ്ട്രക്ചര് സ്ഥാപിക്കുന്നതിനാണ് ഓപ്പണ്എഐ ടിസിഎസുമായി ചര്ച്ചകള് നടത്തുന്നത്. ഇന്ത്യയിലെ ആദ്യത്തെ ഗണ്യമായ കമ്പ്യൂട്ടിംഗ് ചുവടുവയ്പ്പാകുമിത്. വലിയ എഐ മോഡലുകളെ പരിശീലിപ്പിക്കാനും, പ്രവര്ത്തിപ്പിക്കാനുമുള്ള ഇന്ത്യയുടെ കഴിവ് ഇതു വര്ധിപ്പിക്കും.ടിസിഎസ് അടുത്തിടെ സ്ഥാപിച്ച ഡാറ്റാ സെന്റര് ഡിവിഷനായ ന്റെ കുറഞ്ഞത് 500 മെഗാ വാട്ട് ഡാറ്റാ സെന്റര് ശേഷി പാട്ടത്തിനെടുക്കാനാണ് ഓപ്പണ്എഐയുടെ ശ്രമം. സ്വകാര്യ ഇക്വിറ്റി സ്ഥാപനമായ ടിപിജി ക്യാപിറ്റല് അടുത്തിടെ ടിസിഎസ് ഹൈപ്പര്വാള്ട്ടില് 1 ബില്യണ് ഡോളര് നിക്ഷേപം നടത്തിയിരുന്നു.
ഓപ്പണ്എഐയ്ക്ക് ഇന്ത്യവേണം
ലോകത്ത് അതിവേഗം വളര്ന്നുകൊണ്ടിരിക്കുന്ന വിപണിയാണ് ഇന്ത്യ. രാജ്യത്ത് ഗൂഗിള് വമ്പന് നിക്ഷേപം നടത്തികൊണ്ടിരിക്കുന്നു. ഇതിനിടെയാണ് ഓപ്പണ്എഐയും പുതിയ നീക്കം. ഇന്ത്യന് ഉപഭോക്താക്കളുടെ ഡാറ്റാ റെസിഡന്സി ആവശ്യങ്ങള് മികച്ച രീതിയില് ഉപയോഗപ്പെടുത്തുകയാണ് ഓപ്പണ്എഐ ലക്ഷ്യം. കൂടുതല് പ്രതികരണശേഷിയുള്ള സേവനം നല്കുന്നതിനും, ഇന്ത്യയില് പ്രാദേശികമായി തങ്ങളുടെ വലിയ ഭാഷാ മോഡലുകള് പരിശീലിപ്പിക്കുന്നും, ഹോസ്റ്റ് ചെയ്യാനും കമ്പനി പദ്ധതിയിടുന്നു.
ടിസിഎസിന് നേട്ടം
ഓപ്പണ്എഐയുമായുള്ള ബന്ധം ടാറ്റയ്ക്ക് വലിയ നേട്ടമാകും. കാരണം ഓപ്പണ്എഐയുടെ ചാറ്റ്ജിപിടി അത്രമേല് ശക്തമാണ്. അടുത്ത തലമുറ എഐ സേവന ദാതാവായി മാറുകയെന്ന ടിസിഎസിന്റെ ലക്ഷ്യത്തിന് ഓപ്പണ്എഐ കൂട്ടുകെട്ട് മികച്ച കരുത്തുപകരും. കരാറിന്റെ ഭാഗമായി ബിഎഫ്എസ്ഐ, റീട്ടെയില്, കണ്സ്യൂമര് ഗുഡ്സ്, നിര്മ്മാണ മേഖലകളിലെ കമ്പനികള്ക്കായി ‘ഏജന്റിക് എഐ’ സൊല്യൂഷനുകള് പരിശീലിപ്പിക്കുന്നതിനും, വിതരണം ചെയ്യുന്നതിനും ടിസിഎസിന് ഓപ്പണ്എഐയുടെ പ്രാദേശിക ഭാഷാ മോഡലുകള് ഉപയോഗിക്കാന് കഴിയും.
ടിസിഎസ്- ഓപ്പണ്എഐ കൂട്ടുകെട്ട്
ആഗോള എഐ ആവാസവ്യവസ്ഥയില് ഇന്ത്യ ഒരു പ്രധാന കേന്ദ്രമായി മാറികൊണ്ടിരിക്കുന്നു. ഈ സമയത്താണ് ഓപ്പണ്എഐ യുഎസിന് പുറത്ത് മറ്റൊരു വലിയ ഉപയോക്തൃ അടിത്തറയ്ക്ക് ഒരുങ്ങുന്നത്. ഇന്ത്യ ഡാറ്റാ പ്രാദേശികവല്ക്കരണത്തിന് ഊന്നല് നല്കുന്നതു വമ്പന് കമ്പനികളെ രാജ്യത്തേയ്ക്ക് ആകര്ഷിക്കുന്നു. കഴിഞ്ഞ കുറച്ച് മാസങ്ങളായി ഇന്ത്യയില് എഐ, ക്ലൗഡ് ഇന്ഫ്രാസ്ട്രക്ചര് എന്നിവയില് വലിയ താല്പ്പര്യം കാണിക്കുന്ന ആഗോള ടെക് കമ്പനികളുടെ എ്ണ്ണം വര്ധിക്കുകയാണ്.
വമ്പന് ഓഫറുകള്
എഐ വിപണിയില് ഇന്ത്യയുടെ സ്ഥാനം വ്യക്തമാക്കുന്നതാണ് അടുത്തിലെ നടന്ന പ്രഖ്യാപനങ്ങള് എല്ലാം. ഇന്തയയില് എഐ ഹബ് നിര്മ്മിക്കുന്നതിന് അഞ്ച് വര്ഷത്തിനുള്ളില് 15 ബില്യണ് ഡോളര് നിക്ഷേപിക്കുമെന്ന് ഗൂഗിള് വ്യക്തമാക്കിയിട്ടുണ്ട്.
ഇന്ത്യയില് ക്ലൗഡ്, എഐ ഇന്ഫ്രാസ്ട്രക്ചര് വികസനത്തിന് 3 ബില്യണ് ഡോളര് നിക്ഷേപിക്കുമെന്ന് മൈക്രോസോഫ്റ്റും വ്യക്തമാക്കിയിട്ടുണ്ട്. 2030 ഓടെ എഐ വൈദഗ്ധ്യമുള്ള ധാരാളം ആളുകളെ പരിശീലിപ്പിക്കുമെന്നും കമ്പനി പറഞ്ഞു.
രാജ്യത്ത് ക്ലൗഡ്, എഐ ഇന്ഫ്രാസ്ട്രക്ചര് വളര്ത്തുന്നതിന് 2030 ആകുമ്പോഴേക്കും 12.7 ബില്യണ് ഡോളര് നിക്ഷേപിക്കുമെന്ന് ആഗോള പ്രമുഖരായ എഡബ്ല്യുഎസും പറഞ്ഞിട്ടുണ്ട്.
പ്രാദേശിക ഐടി, ടെക് കമ്പനികള്ക്ക് പുറമേ റിലയന്സ്, അദാനി, എയര്ടെല് അടക്കമുള്ള പ്രമുഖരും എ്ഐ, ക്ലൗഡ് നിക്ഷേപങ്ങളില് പ്രവര്ത്തിക്കുന്നു.
