കേരള മുഖ്യമന്ത്രിയും ഇന്ത്യയിലെ യു.എസ്. അംബാസഡറും കൊച്ചിയിൽ കൂടിക്കാഴ്ച നടത്തി
കേരള മുഖ്യമന്ത്രി ശ്രീ. വി.ഡി. സതീശൻ ഇന്ത്യയിലെ അമേരിക്കൻ ഐക്യനാടുകളുടെ അംബാസഡർ എച്ച്.ഇ. സെർജിയോ ഗോറുമായി ഇന്ന് കൊച്ചിയിൽ കൂടിക്കാഴ്ച നടത്തി. കേരള ചീഫ് സെക്രട്ടറിയും സംസ്ഥാന സർക്കാരിലെ മുതിർന്ന ഉദ്യോഗസ്ഥരും കൂടിക്കാഴ്ചയിൽ പങ്കെടുത്തു.
കേരളവും അമേരിക്കയും തമ്മിലുള്ള പരസ്പര താൽപര്യമുള്ള മേഖലകളിലെ സഹകരണം ശക്തിപ്പെടുത്തുന്നതുമായി ബന്ധപ്പെട്ടായിരുന്നു പ്രധാന ചർച്ചകൾ. ഉന്നത വിദ്യാഭ്യാസം, ടൂറിസം, സംസ്കാരം, നിക്ഷേപം, സമുദ്രവികസനം തുടങ്ങിയ മേഖലകളിൽ കൂടുതൽ സഹകരണത്തിനുള്ള സാധ്യതകൾ ചർച്ച ചെയ്തു.
കേരളത്തിലെ സർവകലാശാലകളും ഗവേഷണ സ്ഥാപനങ്ങളും അമേരിക്കയിലെ സ്ഥാപനങ്ങളും തമ്മിൽ സംയുക്ത ഗവേഷണം, അക്കാദമിക് കൈമാറ്റം, നവീകരണ മേഖലകളിലെ പങ്കാളിത്തം എന്നിവ ഉൾപ്പെടെയുള്ള കൂടുതൽ സഹകരണ സാധ്യതകളുണ്ടെന്ന് മുഖ്യമന്ത്രി ചൂണ്ടിക്കാട്ടി. സാംസ്കാരിക ബന്ധങ്ങളും ജനങ്ങൾ തമ്മിലുള്ള ഇടപെടലുകളും കൂടുതൽ ശക്തിപ്പെടുത്തുന്നതിനെക്കുറിച്ചും ചർച്ച നടന്നു.
കേരളത്തിലേക്കുള്ള തന്റെ ആദ്യ സന്ദർശനമാണിതെന്ന് അംബാസഡർ സെർജിയോ ഗോഡ് പറഞ്ഞു. സംസ്ഥാനത്തിന്റെ പ്രകൃതി സൗന്ദര്യം, സമ്പന്നമായ സാംസ്കാരിക പൈതൃകം, അന്താരാഷ്ട്ര ടൂറിസം കേന്ദ്രമെന്ന നിലയിലുള്ള സാധ്യതകൾ എന്നിവയിൽ തനിക്ക് ഏറെ മതിപ്പുണ്ടെന്നും അദ്ദേഹം പറഞ്ഞു.
അമേരിക്കയിൽ നിന്നുള്ള കൂടുതൽ വിനോദസഞ്ചാരികളെ കേരളത്തിലേക്ക് ആകർഷിക്കുന്നതിനുള്ള സാധ്യതകളും അദ്ദേഹം ചൂണ്ടിക്കാട്ടി. പ്രത്യേകിച്ച് വെൽനസ്, ആയുർവേദ ടൂറിസം മേഖലകളിലെ കേരളത്തിന്റെ സാധ്യതകൾ പ്രയോജനപ്പെടുത്താനാകുമെന്ന് അദ്ദേഹം അഭിപ്രായപ്പെട്ടു.
കേരളത്തിലെയും അമേരിക്കയിലെയും നഗരങ്ങൾ തമ്മിൽ ‘സിസ്റ്റർ സിറ്റീസ്’ പങ്കാളിത്തം സ്ഥാപിക്കുന്നതിനുള്ള സാധ്യതകൾ പരിശോധിക്കണമെന്നും അംബാസഡർ നിർദേശിച്ചു. സാംസ്കാരിക, വിദ്യാഭ്യാസ, സാമ്പത്തിക, ജനങ്ങൾ തമ്മിലുള്ള ബന്ധങ്ങൾ കൂടുതൽ ശക്തിപ്പെടുത്താൻ ഇത്തരം പങ്കാളിത്തങ്ങൾ സഹായിക്കുമെന്ന് അദ്ദേഹം പറഞ്ഞു.
അന്താരാഷ്ട്ര നിക്ഷേപങ്ങളുടെ പ്രധാന കേന്ദ്രമായി കേരളം വളർന്നുവരുന്നതായും പ്രത്യേകിച്ച് തുറമുഖങ്ങൾ, ലോജിസ്റ്റിക്സ്, തുറമുഖാധിഷ്ഠിത വികസനം തുടങ്ങിയ മേഖലകളിൽ വലിയ സാധ്യതകളുണ്ടെന്നും മുഖ്യമന്ത്രി പറഞ്ഞു.
വിഴിഞ്ഞം അന്താരാഷ്ട്ര തുറമുഖം, കൊച്ചി തുറമുഖം എന്നിവയുമായി ബന്ധപ്പെട്ട സമുദ്ര ഗതാഗതം, കപ്പൽ നിർമ്മാണം, കപ്പൽ അറ്റകുറ്റപ്പണി, ഗ്രീൻ ബങ്കറിംഗ് തുടങ്ങിയ മേഖലകളിലെ നിക്ഷേപ സാധ്യതകളും ചർച്ചയായി.
അമേരിക്കൻ കമ്പനികളും കേരളവും തമ്മിലുള്ള കൂടുതൽ ഇടപെടലുകൾക്ക് സഹായം നൽകുന്നതിൽ താൽപര്യമുണ്ടെന്ന് അംബാസഡർ അറിയിച്ചു. കേരളത്തിലെ നിക്ഷേപ അവസരങ്ങളിലേക്ക് കൂടുതൽ അമേരിക്കൻ കമ്പനികളെ എത്തിക്കുന്നതിനും അതുവഴി മികച്ച നിക്ഷേപങ്ങളും കേരളവും അമേരിക്കയും തമ്മിലുള്ള ശക്തമായ സാമ്പത്തിക ബന്ധവും സാധ്യമാക്കുന്നതിനുമുള്ള സാധ്യതകൾ അദ്ദേഹം ചൂണ്ടിക്കാട്ടി.
അമേരിക്കയിലെ മലയാളി സമൂഹവുമായും ബിസിനസ് ശൃംഖലകളുമായും കൂടുതൽ ശക്തമായ ബന്ധം സ്ഥാപിക്കുന്നതിനുള്ള മാർഗങ്ങളും കൂടിക്കാഴ്ചയിൽ ചർച്ച ചെയ്തു.
ഇതിന്റെ ഭാഗമായി അമേരിക്കയിൽ ഒരു ‘ഇൻവെസ്റ്റ് ഡെസ്ക്’ സ്ഥാപിക്കുന്നതിനുള്ള സാധ്യത പരിശോധിക്കണമെന്ന് മുഖ്യമന്ത്രി നിർദേശിച്ചു. കേരളത്തിലെ നിക്ഷേപ അവസരങ്ങളെക്കുറിച്ചുള്ള അന്വേഷണങ്ങൾക്ക് സഹായം നൽകാനും, നിക്ഷേപകരെയും കമ്പനികളെയും കേരളത്തിലെ അവസരങ്ങളുമായി ബന്ധിപ്പിക്കാനും, അമേരിക്കയിലെ മലയാളി സമൂഹവുമായും വിശാലമായ യു.എസ്. ബിസിനസ് സമൂഹവുമായും ബന്ധം ശക്തിപ്പെടുത്താനും ഈ സംവിധാനം സഹായിക്കുമെന്ന് മുഖ്യമന്ത്രി വ്യക്തമാക്കി.
കേരളവും അമേരിക്കയും തമ്മിലുള്ള പരസ്പര പ്രയോജനകരമായ സഹകരണം കൂടുതൽ ശക്തിപ്പെടുത്തുന്നതിനും വിവിധ മേഖലകളിലെ അവസരങ്ങൾ മുന്നോട്ട് കൊണ്ടുപോകുന്നതിനും അടുത്തിടപെടലുകൾ തുടരാൻ ഇരുപക്ഷവും താൽപര്യം പ്രകടിപ്പിച്ചു.
More like this
