വളരെക്കാലമായി വിവാഹങ്ങൾ വധുവിന്റെ മാത്രം ദിവസമായാണ് കണക്കാക്കപ്പെട്ടിരുന്നത്. മാസങ്ങൾ നീണ്ട തയ്യാറെടുപ്പുകൾക്കൊടുവിൽ വസ്ത്രങ്ങളും ആഭരണങ്ങളും ഹെയർ സ്റ്റൈലും മേക്കപ്പും വധു കൃത്യമായി പ്ലാൻ ചെയ്യുമ്പോൾ, രാവിലെ എഴുന്നേൽക്കുക, വസ്ത്രം ധരിക്കുക, മുടിയും താടിയും ഒന്നു ശരിയാക്കുക എന്നതായിരുന്നു വരൻമാരുടെ രീതി.
എന്നാൽ അതെല്ലാം ഇപ്പോൾ പഴങ്കഥയാണ്. ഇന്ന് പുരുഷന്മാരും തങ്ങളുടെ വിവാഹദിവസത്തെ ലുക്കിന് വലിയ പ്രാധാന്യം നൽകുന്നുണ്ട്. വസ്ത്രധാരണത്തിൽ പുതിയ പരീക്ഷണങ്ങൾ നടത്തുന്നതിനൊപ്പം, ആത്മവിശ്വാസം തോന്നിക്കാനും തിളക്കമുള്ള ലുക്ക് ലഭിക്കാനും പ്രൊഫഷണൽ ഗ്രൂമിംഗും മേക്കപ്പും അവർ തിരഞ്ഞെടുക്കുന്നു. ക്യാമറയ്ക്ക് മുന്നിലും ജീവിതത്തിലും തങ്ങളുടെ പങ്കാളിയെ പോലെ തന്നെ സുന്ദരന്മാരായി ഇരിക്കണമെന്ന് ഇന്ന് പല വരന്മാരും ആഗ്രഹിക്കുന്നുണ്ട്.
വിവാഹങ്ങൾ ഇന്ന് വലിയ ആഘോഷങ്ങളും സോഷ്യൽ മീഡിയ ഇവന്റുകളുമായി മാറിയതാണ് ഇതിന് പ്രധാന കാരണമെന്ന് പ്രശസ്ത മേക്കപ്പ് ആർട്ടിസ്റ്റ് വിഭ ഗുസൈൻ ഇന്ത്യ ടുഡേയോട് പറഞ്ഞു. ‘ഇന്ന് വധൂവരന്മാർക്ക് സ്വന്തമായി ഹാഷ്ടാഗുകളും സോഷ്യൽ മീഡിയ ടീമുകളും ഇൻസ്റ്റാഗ്രാം അക്കൗണ്ടുകളുമുണ്ട്. അതിനാൽ ക്യാമറയ്ക്ക് മുന്നിൽ ഫ്രഷ് ആയി ഇരിക്കേണ്ടത് വരന്മാരുടെയും ആവശ്യമായി മാറി,’ അവർ പറയുന്നു.
വരന്മാർ എന്താണ് തിരഞ്ഞെടുക്കുന്നത്?
പുരുഷന്മാർ മേക്കപ്പ് ഇടുന്നത് നമ്മുടെ സമൂഹത്തിൽ ഇപ്പോഴും വലിയൊരു വിഭാഗം അംഗീകരിച്ചിട്ടില്ലെന്നത് യാഥാർത്ഥ്യമാണ്. അതിനാൽ തന്നെ മേക്കപ്പ് ഇട്ടാലും അത് പുറമെ അറിയരുതെന്ന് നിർബന്ധമുള്ളവരാണ് ഭൂരിഭാഗം വരന്മാരും.
‘കൂടുതൽ പേരും നാച്ചുറൽ ലുക്കാണ് ആവശ്യപ്പെടുന്നത്. കണ്ണുകൾക്ക് താഴെയുള്ള കറുപ്പ് മാറ്റുക, മുഖത്തെ പാടുകൾ മറയ്ക്കുക എന്നിവയ്ക്കാണ് മുൻഗണന. മുഖത്ത് അമിതമായ തിളക്കം ഒഴിവാക്കാൻ മാറ്റ് (Matte) ഫിനിഷിംഗ് മേക്കപ്പ് ആണ് പുരുഷന്മാർക്ക് നൽകാറുള്ളത്. താടിയും മുടിയും സ്റ്റൈൽ ചെയ്യുന്നതിലൂടെ അവരുടെ ഏറ്റവും മികച്ച രൂപം പുറത്തെടുക്കാൻ സാധിക്കും,’ വിഭ വ്യക്തമാക്കുന്നു.
വധുവിന്റേതു പോലെ തന്നെ വരന്റെ മേക്കപ്പിനും സാധാരണയേക്കാൾ കൂടുതൽ തുക ഈടാക്കാറുണ്ട്. ആർട്ടിസ്റ്റിനെ ആശ്രയിച്ച് ഇത് 10,000 രൂപ മുതൽ 50,000 രൂപ വരെയാകാം.
പ്രീ-വെഡിങ് ബ്യൂട്ടി ട്രീറ്റ്മെന്റുകൾ
വിവാഹ ദിവസത്തെ മേക്കപ്പ് മാത്രമല്ല, ആഴ്ചകൾക്ക് മുൻപേയുള്ള ചർമ്മസംരക്ഷണവും ഇപ്പോൾ വരന്മാർക്കിടയിൽ ട്രെൻഡാണ്. ബെംഗളൂരുവിലെ ആസ്റ്റർ സി.എം.ഐ ഹോസ്പിറ്റലിലെ സീനിയർ കൺസൾട്ടന്റ് ഡോ. ഷിറീൻ ഫർട്ടാഡോ പറയുന്നത്, ഫേഷ്യൽ, ഹെയർ ട്രീറ്റ്മെന്റ്, സ്കിൻ ബ്രൈറ്റനിംഗ് എന്നിവയ്ക്കായി വരുന്ന പുരുഷന്മാരുടെ എണ്ണത്തിൽ വലിയ വർധനവുണ്ടെന്നാണ്
‘അവരിൽ ഭൂരിഭാഗവും ഫേഷ്യലുകൾ, ഹെയർ ട്രീറ്റ്മെന്റുകൾ, സ്കിൻ ബ്രൈറ്റനിംഗ്, ഗ്രൂമിംഗ് പാക്കേജുകൾ എന്നിവയാണ് തിരഞ്ഞെടുക്കുന്നത്. ചിലർ ആന്റി-ടാൻ തെറാപ്പികൾ അല്ലെങ്കിൽ സ്ലിമ്മിംഗ് സെഷനുകൾ പോലുള്ള ശരീര ചികിത്സകളും തിരഞ്ഞെടുക്കുന്നു,’ ഡോ. ഷിറീൻ പറഞ്ഞു.
ആശങ്ക വേണ്ട, ഇത് നിങ്ങളുടെ ദിവസമാണ്
വിവാഹത്തിന് മേക്കപ്പ് വേണോ വേണ്ടയോ എന്ന് സംശയിച്ച് നിൽക്കുന്ന വരനാണോ നിങ്ങൾ? എങ്കിൽ ഓർക്കുക, ഇത് മറ്റൊരാളാകാൻ വേണ്ടിയോ ശ്രദ്ധ ആകർഷിക്കാൻ വേണ്ടിയുള്ള ശ്രമമോ അല്ല, മറിച്ച്, ജീവിതത്തിലെ ഏറ്റവും പ്രധാനപ്പെട്ട ദിവസം ആത്മവിശ്വാസത്തോടെയും സന്തോഷത്തോടെയും ഇരിക്കാൻ വേണ്ടിയുള്ളതാണ്. നിങ്ങൾക്ക് അത് ഗുണകരമായി തോന്നുന്നുണ്ടെങ്കിൽ തീർച്ചയായും പരീക്ഷിക്കാവുന്നതാണ്. കാരണം ഇത് നിങ്ങളുടെയും കൂടി ദിവസമാണ്!
