ടെലികോം മേഖലയിൽ വൻ മാറ്റങ്ങൾക്ക് വഴിതുറക്കുന്ന 5ജി നെറ്റ്വർക്ക് സ്ലൈസിംഗ് സാങ്കേതികവിദ്യ നടപ്പിലാക്കാൻ നിലവിലെ നെറ്റ് ന്യൂട്രാലിറ്റി നിയമങ്ങളിൽ ഇളവുകൾ വരുത്തുന്നതിനെക്കുറിച്ച് കേന്ദ്ര സർക്കാരും ട്രോയിയും (TRAI) ആലോചിക്കുന്നു. ഒരേ നെറ്റ്വർക്കിനെ പല ഭാഗങ്ങളായി തിരിച്ച് ഗെയിമിംഗ്, ഹെൽത്ത്കെയർ, സ്മാർട്ട് ഫാക്ടറികൾ, സ്വയം ഓടിക്കുന്ന വാഹനങ്ങൾ തുടങ്ങിയവയ്ക്ക് തടസമില്ലാത്ത അതിവേഗ കണക്റ്റിവിറ്റി നൽകാൻ ഇതിലൂടെ സാധിക്കും. ഇത്തരം പ്രത്യേക സേവനങ്ങൾക്ക് കൂടുതൽ തുക ഈടാക്കാൻ കമ്പനികൾക്ക് സാധിക്കുമെങ്കിലും, ഇത് രാജ്യത്തെ ഡിജിറ്റൽ സമത്വത്തെയും സാധാരണക്കാരായ ഉപയോക്താക്കളുടെ പ്രതിമാസ ബജറ്റിനെയും ബാധിച്ചേക്കാമെന്നാണ് വിലയിരുത്തൽ.
ഇന്റർനെറ്റ് സേവനങ്ങളിൽ വിവേചനം പാടില്ലെന്നും എല്ലാവർക്കും തുല്യവേഗത ഉറപ്പാക്കണമെന്നും വ്യവസ്ഥ ചെയ്യുന്നതാണ് 2018-ൽ ഇന്ത്യ അംഗീകരിച്ച നെറ്റ് ന്യൂട്രാലിറ്റി നിയമം. എന്നാൽ, 5ജി അടിസ്ഥാനസൗകര്യ വികസനത്തിനായി മുടക്കിയ ഭീമമായ തുക തിരിച്ചുപിടിക്കാനും കൂടുതൽ ലാഭമുണ്ടാക്കാനും വ്യവസ്ഥകളിൽ ഇളവ് വേണമെന്നാണ് റിലയൻസ് ജിയോ, ഭാരതി എയർടെൽ, വൊഡഫോൺ ഐഡിയ എന്നീ കമ്പനികളുടെ നിലപാട്. കൂടുതൽ പണം നൽകുന്നവർക്ക് ‘പ്രീമിയം’ അല്ലെങ്കിൽ ‘പ്രയോറിറ്റി’ പ്ലാനുകൾ നൽകാൻ നിയമമാറ്റം വഴിയൊരുക്കും. എയർടെലിന്റെ പ്രയോറിറ്റി പോസ്റ്റ്പെയ്ഡ് പ്ലാൻ ഇതിനൊരു ഉദാഹരണമാണ്. പുതിയ സാങ്കേതികവിദ്യകൾക്ക് നിലവിലെ നിയമം തടസമാണെന്നും മാറ്റങ്ങൾ നെറ്റ്വർക്കിലെ തിരക്ക് കുറയ്ക്കുമെന്നും ടെലികോം കമ്പനികൾ വാദിക്കുന്നു.
എന്നാൽ, നിയമത്തിൽ ഇളവ് വരുന്നത് വൻകിട കോർപ്പറേറ്റുകൾക്കും പ്രീമിയം ഉപയോക്താക്കൾക്കും മാത്രം മികച്ച സേവനം ലഭിക്കുന്ന അവസ്ഥയ്ക്ക് കാരണമാകുമെന്ന് ചൂണ്ടിക്കാണിക്കപ്പെടുന്നു. ഉപയോക്താക്കളെ ഉയർന്ന പ്ലാനുകളിലേക്ക് മാറ്റാൻ സാധാരണ പ്ലാനുകളുടെ വേഗത മനഃപ്പൂർവ്വം കുറച്ചേക്കുമെന്നും, അതിവേഗ ഇന്റർനെറ്റിനായി തുക മുടക്കാൻ സാധിക്കാത്ത ചെറുകിട വെബ്സൈറ്റ് ഉടമകൾക്ക് വൻകിടക്കാരുമായി മത്സരിക്കാൻ ബുദ്ധിമുട്ടാകുമെന്നും വിദഗ്ധർ മുന്നറിയിപ്പ് നൽകുന്നു. പണം വാങ്ങി പ്രത്യേക വെബ്സൈറ്റുകൾക്ക് മാത്രം വേഗത കൂട്ടുന്നത് അനുവദിക്കില്ലെന്ന് സർക്കാർ വ്യക്തമാക്കുന്നുണ്ടെങ്കിലും, നയം മാറുമ്പോൾ സാധാരണക്കാരുടെ ഡാറ്റാ പ്ലാനുകളെ ബാധിക്കാതിരിക്കാൻ ട്രായ് വ്യക്തമായ മാർഗനിർദ്ദേശങ്ങൾ കൊണ്ടുവരേണ്ടിവരും.
